didani hain dil-e-KHarab ke rang

By

didani hain dil-e-kharab ke rang
aah us chashm-e-pur-hijab ke rang
fasl-e-gul mein paden to khub khilen
khirqa-e-zohad par sharab ke rang
shauq-e-mai dil mein lab pe hijw-e-sharab
hum pe raushan hain sab janab ke rang
nahin tauba ki khair hain jo yahi
josh-e-hangama-e-sahab ke rang
kal ke maqbul aaj hain mardud
aah is daur-e-inqilab ke rang
qabil-e-did hain visal ki shab
aarzu-ha-e-kaamyab ke rang
chehra-e-ashiqi hai pazh-murda
kya hue wo mai-e-shabab ke rang
khail-e-khuban se ek mein bhi nahin
aap ke husn-e-la-jawab ke rang
meri mayusiyon se hain paida
kashmakash-ha-e-iztirab ke rang
dil ke hathon bahut rahe hain kharab
'hasrat'-e-khanuman kharab ke rang

barkaten sab hain ayan daulat-e-ruhani ki

By

barkaten sab hain ayan daulat-e-ruhani ki
wah kya baat hai us chehra-e-nurani ki
shauq dekhe tujhe kis aankh se ai mehr-e-jamal
kuchh nihayat hi nahin teri darakhshani ki
mujh se wo sag bhi hai afzal jise izzat ho nasib
aastan-e-haram-e-yar pe darbani ki
jab suna yaad kiya karte ho tum bhi to mujhe
kya kahun had na rahi kuchh meri hairani ki
sai-e-ahbab ko nahaq hai rihai ka khayal
aur hi kuchh hai tamanna tere zindani ki
wo tabassum bhi qayamat hai tera baad-e-jafa
tu ne di ho jise khidmat namak-afshani ki
mushkilon se jo muqabil hui himmat meri
qadr baqi na rahi aish-e-tan-asani ki
rah gaya jal ke teri bazm mein parwana jo raat
khinch gai shakl meri sokhta-samani ki
rashk-e-shahi ho na kyun apni faqiri 'hasrat'
kab se karte hain ghulami shah-e-jilani ki

aur to pas mere hijr mein kya rakkha hai

By

aur to pas mere hijr mein kya rakkha hai
ek tere dard ko pahlu mein chhupa rakkha hai
dil se arbab-e-wafa ka hai bhulana mushkil
hum ne ye un ke taghaful ko suna rakkha hai
tum ne baal apne jo phulon mein basa rakkhe hain
shauq ko aur bhi diwana bana rakkha hai
sakht bedard hai tasir-e-mohabbat ki unhen
bistar-e-naz pe sote se jaga rakkha hai
aah wo yaad ki us yaad ko ho kar majbur
dil-e-mayus ne muddat se bhula rakkha hai
kya tammul hai mere qatl mein ai bazu-e-yar
ek hi war mein sar tan se juda rakkha hai
husn ko jaur se begana na samjho ki use
ye sabaq ishq ne pahle hi padha rakkha hai
teri nisbat se sitamgar tere mayuson ne
dagh-e-hirman ko bhi sine se laga rakkha hai
kahte hain ahl-e-jahan dard-e-mohabbat jis ko
nam usi ka dil-e-muztar ne dawa rakkha hai
nigah-e-yar se paikan-e-qaza ka mushtaq
dil-e-majbur nishane pe khula rakkha hai
is ka anjam bhi kuchh soch liya hai 'hasrat'
tu ne rabt un se jo is darja badha rakkha hai

aasan-e-haqiqi hai na kuchh sahal-e-majazi

By

aasan-e-haqiqi hai na kuchh sahal-e-majazi
malum hui rah-e-mohabbat ki daraazi
kuchh lutf o nazar lazim o malzum nahin hain
ek ye bhi tamanna ki na ho shobada bazi
dil khub samajhta hai tere harf-e-karam ko
har-chand wo urdu hai na turki hai na tazi
qaim hai na wo husn-e-rukh-e-yar ka aalam
baqi hai na wo shauq ki hangama-nawazi
ai ishq teri fath bahar-haal hai sabit
mar kar bhi shahidan-e-mohabbat hue ghazi
kar jald hamein khatm kahin ai gham-e-jaanan
kaam aaegi kis roz teri sina-gudazi
malum hai duniya ko ye 'hasrat' ki haqiqat
khalwat mein wo mai-khwar hai jalwat mein namazi

wo chup ho gae mujhse kya kahte kahte

By

wo chup ho gae mujh se kya kahte kahte
ki dil rah gaya muddaa kahte kahte
mera ishq bhi khud-gharaz ho chala hai
tere husn ko bewafa kahte kahte
shab-e-gham kis aaram se so gae hain
fasana teri yaad ka kahte kahte
ye kya pad gai khu-e-dushnam tum ko
mujhe na-saza barmala kahte kahte
khabar un ko ab tak nahin mar mite hum
dil-e-zar ka majra kahte kahte
ajab kya jo hai bad-guman sab se waiz
bura sunte sunte bura kahte kahte
wo aae magar aae kis waqt 'hasrat'
ki hum chal base marhaba kahte kahte

wasl ki banti hain in baaton se tadbiren kahin

By

wasl ki banti hain in baaton se tadbiren kahin
aarzuon se phira karti hain taqdiren kahin
be-zabani tarjuman-e-shauq behad ho to ho
warna pesh-e-yar kaam aati hain taqriren kahin
mit rahi hain dil se yaaden rozgar-e-aish ki
ab nazar kahe ko aaengi ye taswiren kahin
iltifat-e-yar tha ek khwab-e-aghaz-e-wafa
sach hua karti hain in khwabon ki tabiren kahin
teri be-sabri hai 'hasrat' kham-kari ki dalil
girya-e-ushshaq mein hoti hain tasiren kahin