gareban hath mein hai panw mein sahra ka daman hai

By

gareban hath mein hai panw mein sahra ka daman hai
bas ab panw hain apne aur sar-e-khar-e-mughilan hai
hawa-e-dasht-e-wahshat hum ko le udti hai basti se
hamara unsur-e-khaki magar reg-e-bayaban hai
sabaq ko dekhta hun raat bhar aur phir ulajhta hun
mutawwal mukhtasar wo sharh-e-sher-e-zulf-e-pechan hai
jalata hai ye parwanon ko wasf-e-shoala-ruyan se
zaban-e-khama bhi ab to zaban-e-sham-e-sozan hai

zaiqa maut ka bas yaad dila deta hai

By

zaiqa maut ka bas yaad dila deta hai
kya qayamat hai ye kahna tera hum bhul gae
kaba-e-dil mein bas ab rahti hai allah ki yaad
rasta dair ka hum shakal-sanam bhul gae
yaad rakhne ki ye baaten hain baja hai sach hai
aap bhule na hamein aap ko hum bhul gae
dil se dil ko hai agar rah to hai yaad se yaad
tum hamein bhul gae tum ko bhi hum bhul gae
sher-e-hindi jo sune 'mehar' jigar tafta ke
apna andaz fasihan-e-ajam bhul gae

wahshat-afza kis qadar apna bhi afsana hua

By

wahshat-afza kis qadar apna bhi afsana hua
mera qissa sunte sunte qais diwana hua
kal wahan par howega gor-e-ghariban ka maqam
aaj jis ja par bana qasr-e-amirana hua
ab kahin koi thikana hi nahin juz-ku-e-yar
murtad-e-kaba hua mardud-e-but-khana hua
jam-e-kausar saqi-e-kausar bhi denge hashr mein
dast-e-saqi se inayat mujh ko paimana hua
kaun aisa hai jo mujh be-kas ki dildari kare
darpa-e-jaan dost dushman apna begana hua
dar-ba-dar mara-phira main justuju-e-yar mein
zahid-e-kaba hua rahban-e-but-khana hua
mere ghar aaya hai mere sher sunne ko wo 'mehar'
ghairat-e-bait-ushsharf apna bhi kashana hua

qata ho kar kakul-e-shab-gir aadhi rah gai

By

qata ho kar kakul-e-shab-gir aadhi rah gai
ab to ai saudaiyo zanjir aadhi rah gai
sari botal ab kahan aadhi mein karte hain guzar
munsifi se mohtasib tazir aadhi rah gai
sham ka wada kiya aae wo aadhi raat ko
jazba-e-dil ki mere tasir aadhi rah gai
dhal gaya ahd-e-jawani ho gaya aakhir shabab
zindagi apni bhi charkh-e-pir aadhi rah gai
jubba-sai karte karte ghis gai lauh-e-jabin
meri qismat ki jo thi tahrir aadhi rah gai
sari izzat naukri se is zamane mein hai 'mehar'
jab hue be-kar bas tauqir aadhi rah gai

poshak-e-siyah mein ruKH-e-jaanan nazar aaya

By

poshak-e-siyah mein rukh-e-jaanan nazar aaya
shab ko hamein khurshid darakhshan nazar aaya
dekha na kahin kufr na iman nazar aaya
hindu koi paya na musalman nazar aaya
phir josh-e-junun silsila jumba nazar aaya
phir be-sar-o-samani ka saman nazar aaya
bain-hama wusat bhi hai kiya khwan-e-falak-tang
aasuda na us ka koi mehman nazar aaya
diwana hun par kaam mein hoshiyar hun apne
yusuf ka khayal aaya jo zindan nazar aaya
mayus phiri aati hain kyun meri duaen
kya bab-e-ijabat pe bhi darban nazar aaya
main zar-e-mah-e-nau hun ki us ne mujhe ai 'mehar'
jab ghaur se dekha to kaha han nazar aaya

kya tafraqa hua jo hue yar se alag

By

kya tafraqa hua jo hue yar se alag
dil hum se aur hum hain dil-e-zar se alag
deta nahin hai sath bure waqt mein koi
taqat bhi ho gai hai tan-e-zar se alag
ithla rahi hai hosh uda de bahaar ke
kar de saba naqab rukh-e-yar se alag
chilman se jhank-tank hai madd-e-nazar juda
ladti hai aankh rauzan-e-diwar se alag
ai aasman chhuda na masiha se 'mehar' ko
dam bhi ho tabib na bimar se alag