kya dhoka dene aaogi

By

hum banjare dil wale hain
aur painth mein dere dale hain
tum dhoka dene wali ho?
hum dhoka khane wale hain
is mein to nahin sharmaogi?
kya dhoka dene aaogi?
sab mal nikalo, le aao
ai basti walo le aao
ye tan ka jhuta jadu bhi
ye man ki jhuti khushbu bhi
ye tal banate aansu bhi
ye jal bichhate gesu bhi
ye larzish dolte sine ki
par sach nahin bolte sine ki
ye hont bhi, hum se kya chori
kya sach-much jhute hain gori?
in ramzon mein in ghaton mein
in wadon mein in baaton mein
kuchh khot haqiqat ka to nahin?
kuchh mail sadaqat ka to nahin?
ye sare dhoke le aao
ye pyare dhoke le aao
kyun rakkho khud se dur hamein
jo dam kaho manzur hamein
in kanch ke mankon ke badle
han bolo gori kya logi?
tum ek jahan ki ashrafiyan?
ya dil aur jaan ki ashrafiyan?

kuchh de ise ruKHsat kar

By

kuchh de ise rukhsat kar kyun aankh jhuka li hai
han dar pe tere maula! 'insha' bhi sawali hai
is baat pe kyun is ki itna bhi hijab aae
fariyaad se be-bahra kashkol se khali hai
shaer hai to adna hai, aashiq hai to ruswa hai
kis baat mein achchha hai kis wasf mein aali hai
kis din ka murshid hai, kis kesh ka mojid hai
kis shahr ka shahna hai kis des ka wali hai?
tazim ko uthte hain is waste dil wale
hazrat ne mashikhat ki ek tarah nikali hai
aawara o sargardan kafani-ba-gulu-pechan
daman bhi durida hai guddi bhi sambhaali hai
aawara hai rahon mein, duniya ki nigahon mein
izzat bhi mita li hai tamkin bhi ganwa li hai
aadab se begana, dar aaya hai diwana
ne hath mein tohfa hai, ne sath mein dali hai
bakhshish mein tammul hai aur aankh jhuka li hai
kuchh dar pe tere maula, ye baat nirali hai
'insha' ko bhi rukhsat kar, 'insha' ko bhi kuchh de de
'insha' se hazaron hain, 'insha' bhi sawali hai

kal humne sapna dekha hai

By

kal hum ne sapna dekha hai
jo apna ho nahin sakta hai
us shakhs ko apna dekha hai
wo shakhs ki jis ki khatir hum
is des phiren us des phiren
jogi ka bana kar bhes phiren
chahat ke nirale git likhen
ji mohne wale git likhen
dharti ke mahakte baghon se
kaliyon ki jholi bhar laen
ambar ke sajile mandal se
taron ki doli bhar laen
han kis ke liye sab us ke liye
wo jis ke lab par tesu hain
wo jis ke nainan aahu hain
jo khar bhi hai aur khushbu bhi
jo dard bhi hai aur daru bhi
wo allhad si wo chanchal si
wo shaer si wo pagal si
log aap-hi-ap samajh jaen
hum nam na us ka batlaen
ai dekhne walo tum ne bhi
us nar ki pit ki aanchon mein
is dil ka tina dekha hai?
kal hum ne sapna dekha hai

katik ka chand

By

chand kab se hai sar-e-shakh-e-sanobar atka
ghas shabnam mein sharabor hai shab hai aadhi
baam suna hai, kahan dhunden kisi ka chehra
(log samjhenge ki be-rabt hain baaten apni)
sher ugte hain dukhi zehn se konpal konpal
kaun mausam hai ki bharpur hain gham ki belen
dur pahunche hain sarakte hue ude baadal
chand tanha hai (agar us ki balaen le len?)
dosto ji ka ajab haal hai, lena badhna
chandni raat hai katik ka mahina hoga
mir-e-maghfur ke ashaar na paiham padhna
jine walon ko abhi aur bhi jina hoga
chand thithka hai sar-e-shakh-e-sanobar kab se
kaun sa chand hai kis rut ki hain raaten logo
dhund udne lagi bunne lagi kya kya chehre
achchhi lagti hain diwanon ki si baaten logo
bhigti raat mein dubka hua jhingar bola
kasmasati kisi jhadi mein se khushbu lapki
koi kakul koi daman, koi aanchal hoga
ek duniya thi magar hum se sameti na gai
ye bada chand chamakta hua chehra khole
baitha rahta hai sar-e-baam-e-shabistan shab ko
hum to is shahr mein tanha hain, hamin se bole
kaun is husn ko dekhega ye is se puchho
sone lagti hai sar-e-sham ye sari duniya
in ke hujron mein na dar hai na daricha koi
in ki qismat mein shab-e-mah ko rona kaisa
in ke sine mein na hasrat na tamanna koi
kis se is dard-e-judai ki shikayat kahiye
yan to sine mein niystan ka niystan hoga
kis se is dil ke ujadne ki hikayat kahiye
sunne wala bhi jo hairan nahin, hairan hoga
aisi baaton se na kuchh baat banegi apni
suni aankhon mein nirasha ka ghulega kajal
khali sapnon se na auqat banegi apni
ye shab-e-mah bhi kat jaegi be-kal be-kal
ji mein aati hai ki kamre mein bula len is ko
chand kab se hai sar-e-shakh-e-sanobar atka
raat us ko bhi nigal jaegi bolo bolo
baam par aur na aaega kisi ka chehra

jhulsi si ek basti mein

By

han dekha kal hum ne us ko dekhne ka jise arman tha
wo jo apne shahr se aage qarya-e-bagh-o-bahaaran tha
soch raha hun jang se pahle, jhulsi si is basti mein
kaisa kaisa ghar ka malik, kaisa kaisa mehman tha
sab galiyon mein taranjan the aur har taranjan mein sakhiyan thin
sab ke ji mein aane wali kal ka shauq-e-farawan tha
melon thelon bajon gajon baraaton ki dhumen thin
aaj koi dekhe to samjhe, ye to sada bayaban tha
chaaron jaanib thande chulhe, ujde ujde aangan hain
warna har ghar mein the kamre, har kamre mein saman tha
ujli aur pur-nur shabihen rose namaz ko aati thin
masjid ke in taqon mein bhi kya kya diya farozan tha
ujdi mandi, laghar kutte, tute khambe khali khet
kya is nahr ke pul ke aage aisa shahr-e-khamoshan tha
aaj ki ek roti ki khatir card dikhata phirta hai
pure kamp ko roti de de aisa aisa dahqan tha
tab nahin har ek se puchhen baba tujh par kya guzri
ek ko rok ke puchha hum ne, sina us ka baryan tha
bola log to aaen jaen basti ko phir basna hai
mere tinkon ki khatir aaya sara tufan tha
aag ke andar aur tapish hai, aag ke bahar aur hi aanch
shayad koi diwana hoga be-shak chaak-gireban tha

is basti ke ek kuche mein

By

is basti ke ek kuche mein ek 'insha' nam ka diwana
ek nar pe jaan ko haar gaya mashhur hai us ka afsana
us nar mein aisa rup na tha jis rup se din ki dhup dabe
is shahr mein kya kya gori hai mahtab-rukhe gulnar-labe
kuchh baat thi us ki baaton mein kuchh bhed the us ki chitwan mein
wahi bhed ki jot jagate hain kisi chahne wale ke man mein
use apna banane ki dhun mein hua aap hi aap se begana
is basti ke ek kuche mein ek 'insha' nam ka diwana
na chanchal khel jawani ke na pyar ki alhad ghaten thin
bas rah mein un ka milna tha ya phone pe un ki baaten thin
is ishq pe hum bhi hanste the be-hasil sa be-hasil tha
ek zor bipharte sagar mein na kashti thi na sahil tha
jo baat thi in ke ji mein thi jo bhed tha yaksar an-jaana
is basti ke ek kuche mein ek 'insha' nam ka diwana
ek roz magar barkha-rut mein wo bhadon thi ya sawan tha
diwar pe bich samundar ke ye dekhne walon ne dekha
mastana hath mein hath diye ye ek kagar par baithe the
yun sham hui phir raat hui jab sailani ghar laut gae
kya raat thi wo ji chahta hai us raat pe likkhen afsana
is basti ke ek kuche mein ek 'insha' nam ka diwana
han umr ka sath nibhane ke the ahd bahut paiman bahut
wo jin pe bharosa karne mein kuchh sud nahin nuqsan bahut
wo nar ye kah kar dur hui 'majburi sajan majburi'
ye wahshat se ranjur hue aur ranjuri si ranjuri?
us roz hamein malum hua us shakhs ka mushkil samjhana
is basti ke ek kuche mein ek 'insha' nam ka diwana
go aag se chhati jalti thi go aankh se dariya bahta tha
har ek se dukh nahin kahta tha chup rahta tha gham sahta tha
nadan hain wo jo chhedte hain is aalam mein na-danon ko
us shakhs se ek jawab mila sab apnon ko beganon ko
'kuchh aur kaho to sunta hun is bab mein kuchh mat farmana'
is basti ke ek kuche mein ek 'insha' nam ka diwana
ab aage ka tahqiq nahin go sunne ko hum sunte the
us nar ki jo jo baaten thin us nar ke jo jo qisse the
ek sham jo us ko bulwaya kuchh samjhaya bechaare ne
us raat ye qissa pak kiya kuchh kha hi liya dukhyare ne
kya baat hui kis taur hui akhbar se logon ne jaana
is basti ke ek kuche mein ek insha nam ka diwana
har baat ki khoj to thik nahin tum hum ko kahani kahne do
us nar ka nam maqam hai kya is baat pe parda rahne do
hum se bhi to sauda mumkin hai tum se bhi jafa ho sakti hai
ye apna bayan ho sakta hai ye apni katha ho ho sakti hai
wo nar bhi aakhir pachhtai kis kaam ka aisa pachhtana?
is basti ke ek kuche mein ek 'insha' nam ka diwana