na kah haq mein buzurgon ki kaDi baat

By

na kah haq mein buzurgon ki kadi baat
kahenge log chhota munh badi baat
kahe ek baat phule sau shagufe
shariron ne banai phuljhadi baat
matanat hai bahut kam bolti mein
khamoshi dopahar ho do-ghadi baat
mujhe bhata hai halkana tumhaara
dahan-gul ki kali hai gul-jhadi baat
bandhe mazmun par kholo na munh 'bahr'
maza deti nahin kanon padi baat

mere aage tazkira nashuq-o-ashiq ka bura

By

mere aage tazkira nashuq-o-ashiq ka bura
agli baaten mujh ko yaad aati hain ye charcha bura
na-gahani thi jo main aashiq hua ruswa hua
chahta hai koi duniya mein bhala apna bura
hai yahi surat to hum se raaz-poshi ho chuki
chashm tar lab khushk chehra zard ye naqsha bura
hum gharibon se na puchho nemat-e-duniya ka haal
shukr kar ke kha liya jo kuchh mila achchha bura
ek bose par bhi mera dil na sahab ne liya
itni qimat par to achchha tha na itna tha bura
kar guzariye mere haq mein aap jo manzur ho
aae din ka marka har rose ka jhagda bura
aadmi hota hai sargardan bagule ki tarah
aandhiyan achchhi hawa-o-hirs ka jhonka bura
aae jab wade ke shab mehndi laga baitha wo shokh
dusri raat istikhara aane ko aaya bura
ban ke ud nagan moazzin ko dase zulf-e-sanam
wasl ki shab ko azan-e-subh ka khatka bura
aankh se dekhogi wo kuchh aabru ko roogi
jhank-tak achchhi nahin ai 'bahr' ye lapka bura

mar gae par bhi na ho bojh kisi par apna

By

mar gae par bhi na ho bojh kisi par apna
ruh ke sath hua ho tan-e-laghar apna
be-tarah dil mein bhara rahta hai zulfon ka dhuan
dam nikal jae kisi rose na ghut kar apna
yar sota nahin munh kar ke hamari jaanib
kabhi karwat nahin leta hai muqaddar apna
tum jo do phul chadhao to khushi ke mare
qabr khul jae ye phule tan-e-laghar apna
intizam aap ki sarkar mein yun lazim hai
band-o-bast aap ka ghar mein rahe bahar apna
hur bhi tum ho nigahon mein pari bhi tum ho
ab to ai jaan dil aaya hai tumhin par apna
nur barsati hai zulfon ki ghata chehre par
panw us kuche mein phislega muqarrar apna
nind furqat mein kahan maut se aane wali
ghar se behtar hai jo takiye mein ho bistar apna
khana-barbaad kya ishq ne tifli se hamein
ki mita baithi gharaunde ki tarah ghar apna
ab na kuchh bolte banti hai na chup rahte hamein
na dil apna nazar aata hai na dilbar apna
wada-e-wasl agar aaj bhi pura na hua
ye samajh lijiye wada hai barabar apna
khub-ru kuchh bhi agar banda-nawazi farmaen
maldaron ko karen banda-e-be-zar apna
be gala kate hue raat nahin katne ki
sadqa abru ka diye jaiye khanjar apna
dor hain silk-e-guhar par kahen ashaar ai 'bahr'
qadr-dan ho to sunaen use jauhar apna

main us but ka wasl ai KHuda chahta hun

By

main us but ka wasl ai khuda chahta hun
maraz ishq ka hai dawa chahta hun
bayan-e-malahat kiya chahta hun
sukhan mein namak ka maza chahta hun
na dekhun main us gul ke pahlu mein kanta
ude ghair aisi hua chahta hun
mujhe tasma-bandi ho ai zulf-e-pechan
faqir aaj-kal main hua chahta hun
lagi be-tarah hai khuda hi bachae
sulagta hai dil mein jala chahta hun
bahut karwaten lin nahin nind aati
baghal mein koi dilruba chahta hun
mohabbat mein ye aql zail hui hai
ki ahl-e-dagha se wafa chahta hun
khule haal-e-bimar chashm-e-sukhan-go
ishaaron mein baaten kiya chahta hun
bura man jaoge munh pher loge
na puchho qasam de ke kya chahta hun
nigahen ulajhti hain zulfon mein be-dhab
un aankhon ke hathon phansa chahta hun
mah-e-nau ke misre mein misre lagaun
main itni tabiat-rasa chahta hun
hue chaara-ju kab mariz-e-mohabbat
khuda maut de jo shifa chahta hun
wahi dushman-e-jaan hai ai 'bahr' mera
jise jaan se main siwa chahta hun

main siyah-ru apne Khaaliq se jo neamat mangta

By

main siyah-ru apne khaliq se jo neamat mangta
apna munh dhone ko pahle aab-e-khajlat mangta
mere rukhe-sukhe tukde mujh ko kar dete hain ser
khak bhar deta falak munh mein jo neamat mangta
khalq par hoti jo aadab-e-shahadat aashkar
murgh-e-bismil bhi tadapne ki ijazat mangta
rahm ham-afat-rasidon par jo karta aasman
sans lene ki hujum-e-gham mein mohlat mangta
rolta moti jo karta kisht-kari khair ki
hun barasta main agar baran-e-rahmat mangta
past-bakhti ne mujhe mahfuz rakkha shukr hai
tut padta aasman sar par jo rifat mangta
qadr mere gauhar-e-dil ki kuchh us but ne na ki
but-kada lilam hota main jo qimat mangta
ek bosa mangne par yar ka rukh phir gaya
jaan main deta agar wo be-murawwat mangta
main agar aazadgi mein sarw ko karta murid
tera guldasta sa qad tuba se baiat mangta
dekh pata kushtagan-e-ishq ka rutba agar
pani pi pi kar khizar jam-e-shahadat mangta
dil mein padte zakhm agar gulzar ki karta hawas
main lahu rota agar baran-e-rahmat mangta
kab raha simab jab simab chandi ho gaya
qalb mahiyyat meri hoti jo daulat mangta
kya khabar thi subh ho jaegi tere nur se
sham se mera charagh-e-khana rukhsat mangta
aankh jhuk jati nazar aata agar tu khwab mein
tere khal-e-rukh se yusuf dagh-e-hasrat mangta
khaiye kyunkar niwale motiyon ke ai hawas
tair-e-dil hans ki ai kash qismat mangta
josh-e-wahshat le chala itni na mohlat de mujhe
koh-o-sahra ke azizon se tu rukhsat mangta
dushmani rakhta hai arbab-e-manash se aasman
hath malta umr-bhar dam-bhar jo rahat mangta
be diye mumkin nahin duniya mein ho ijra-e-kar
aamilon se ism-e-azam bhi hai dawat mangta
khun-e-ashiq par kamar bandhe hue hain khub-ru
tegh-e-misri halq par hoti jo sharbat mangta
kya khabar thi aasiyon ki bhi dua maqbul hai
'bahr' duniya ke bakhede se faraghat mangta

mahbub-e-KHuda ne tujhe nayab banaya

By

mahbub-e-khuda ne tujhe nayab banaya
qad sarw kiya rukh gul-e-mahtab banaya
jab kuchh na bani ishq ne betab banaya
khud ban gaya shoala mujhe simab banaya
us husn ke dariya ne jo phir kar mujhe dekha
mauj-e-qadam-e-naz ko girdab banaya
sarmast-e-shahadat hain tere ishq mein saqi
aab-e-dam-e-khanjar ko mai-e-nab banaya
aagah kiya ishq ne qanun-e-wafa se
jab nakhun-e-shamshir ko mizrab banaya
sab uzw-e-badan sham-e-sifat bah gae gal kar
is sozish-e-dil ne mujhe sailab banaya
ek raat udai na meri dukhtar-e-raz se
saqi ne bat-e-mai ko bhi surkhab banaya
jism aisa damakta hai ki kapde chamak utthe
naino ko tere husn ne kamkhab banaya
kab talib-e-rahat hue zakhmi-e-mohabbat
marham ki jo hajat hui tezab banaya
aariz ne kiya sar-ba-zamin sare gulon ko
qamat ne har ek shakh ko mehrab baniya
ai 'bahr' bar-o-bahar mein gardish rahe hum ko
qismat ne bagula tujhe girdab banaya