gham duniya bahut iza-rasan hai

gham duniya bahut iza-rasan hai
kahan hai ai gham-e-jaanan kahan hai
ek aansu kah gaya sab haal dil ka
na samjha tha ye zalim be-zaban hai
khuda mahfuz rakhte aafaton se
kai din se tabiat shadman hai
wo kanta hai jo chubh kar tut jae
mohabbat ki bas itni dastan hai
ye mana zindagi kaamil hai lekin
agar aa jae jina jawedan hai
salam aakhir hai ahl-e-anjuman ko
khumar ab khatm apni dastan hai

hum unhen wo hamein bhula baiThe

hum unhen wo hamein bhula baithe
do gunahgar zahr kha baithe
haal-e-gham kah ke gham badha baithe
tir mare the tir kha baithe
aandhiyo jao ab karo aaram
hum khud apna diya bujha baithe
ji to halka hua magar yaro
ro ke hum lutf-e-gham ganwa baithe
be-sahaaron ka hausla hi kya
ghar mein ghabrae dar pe aa baithe
jab se bichhde wo muskurae na hum
sab ne chheda to lab hila baithe
hum rahe mubtala-e-dair-o-haram
wo dabe panw dil mein aa baithe
uth ke ek bewafa ne de di jaan
rah gae sare ba-wafa baithe
hashr ka din abhi hai dur 'khumar'
aap kyun zahidon mein ja baithe

dil ko taskin-e-yar le Dubi

dil ko taskin-e-yar le dubi
is chaman ko bahaar le dubi
ashk to pi gae hum un ke huzur
aah-e-be-ikhtiyar le dubi
ishq ke karobar ko aksar
garmi-e-karobar le dubi
haal-e-gham un se bar bar kaha
aur hansi bar bar le dubi
tere har mashware ko ai naseh
aaj phir yaad-e-yar le dubi
chaar din ka hi sath tha lekin
zindagi ai 'khumar' le dubi

bujh gaya dil hayat baqi hai

bujh gaya dil hayat baqi hai
chhup gaya chand raat baqi hai
haal-e-dil un se kah chuke sau bar
ab bhi kahne ki baat baqi hai
ai khusha khatam-e-ijtinab magar
mahshar-e-iltifat baqi hai
ishq mein hum samajh chuke sab se
ek zalim hayat baqi hai
nasehan-e-karam ke dam se
shorish-e-kaenat baqi hai
raat baqi thi jab wo bichhde the
kat gai umr raat baqi hai
rahmat-e-be-panah ke sadqe
e'timad-e-najat baqi hai
na wo dil hai na wo shabab 'khumar'
kis liye ab hayat baqi hai

ai maut unhen bhulae zamane guzar gae

ai maut unhen bhulae zamane guzar gae
aa ja ki zahr khae zamane guzar gae
o jaane wale aa ki tere intizar mein
raste ko ghar banae zamane guzar gae
gham hai na ab khushi hai na ummid hai na yas
sab se najat pae zamane guzar gae
kya laiq-e-sitam bhi nahin ab main dosto
patthar bhi ghar mein aae zamane guzar gae
jaan-e-bahaar phul nahin aadmi hun main
aa ja ki muskurae zamane guzar gae
kya kya tawaqquat thin aahon se ai 'khumar'
ye tir bhi chalae zamane guzar gae