chhanw mil jae to kam dam mein bik jati hai

By

chhanw mil jae to kam dam mein bik jati hai
ab thakan thode se aaram mein bik jati hai
aap kya mujh ko nawazenge janab-e-ali
saltanat tak mere inam mein bik jati hai
sher jaisa bhi ho is shahr mein padh sakte ho
chae jaisi bhi ho aasam mein bik jati hai
wo siyasat ka ilaqa hai udhar mat jaana
aabru kucha-e-bad-nam mein bik jati hai

aisa lagta hai ki kar dega ab aazad mujhe

By

aisa lagta hai ki kar dega ab aazad mujhe
meri marzi se udane laga sayyaad mujhe
main hun sarhad pe bane ek makan ki surat
kab talak dekhiye rakhta hai wo aabaad mujhe
ek qisse ki tarah wo to mujhe bhul gaya
ek kahani ki tarah wo hai magar yaad mujhe
kam se kam ye to bata de ki kidhar jaegi
kar ke ai khana-kharabi meri barbaad mujhe
main samajh jata hun is mein koi kamzori hai
mere jis sher pe milti hai bahut dad mujhe

achchha hua ki mera nasha bhi utar gaya

By

achchha hua ki mera nasha bhi utar gaya
teri kalai se ye kada bhi utar gaya
wo mutmain bahut hai mera sath chhod kar
main bhi hun khush ki qarz mera bhi utar gaya
rukhsat ka waqt hai yunhi chehra khila rahe
main tut jaunga jo zara bhi utar gaya
bekas ki aarzu mein pareshan hai zindagi
ab to fasil-e-jaan se diya bhi utar gaya
ro-dho ke wo bhi ho gaya khamosh ek rose
do-chaar din mein rang-e-hina bhi utar gaya
pani mein wo kashish hai ki allah ki panah
rassi ka hath thame ghada bhi utar gaya
wo muflisi ke din bhi guzare hain main ne jab
chulhe se khali hath tawa bhi utar gaya
sach bolne mein nashsha kai botalon ka tha
bas ye hua ki mera gala bhi utar gaya
pahle bhi be-libas the itne magar na the
ab jism se libas-e-haya bhi utar gaya

hum kuchh aise tere didar mein kho jate hain

By

hum kuchh aise tere didar mein kho jate hain
jaise bachche bhare bazar mein kho jate hain
mustaqil jujhana yaadon se bahut mushkil hai
rafta rafta sabhi ghar-bar mein kho jate hain
itna sanson ki rifaqat pe bharosa na karo
sab ke sab mitti ke ambar mein kho jate hain
meri khuddari ne ehsan kiya hai mujh par
warna jo jate hain darbar mein kho jate hain
dhundhne roz nikalte hain masail hum ko
roz hum surkhi-e-akhbar mein kho jate hain
kya qayamat hai ki sahraon ke rahne wale
apne ghar ke dar-o-diwar mein kho jate hain
kaun phir aise mein tanqid karega tujh par
sab tere jubba-o-dastar mein kho jate hain

han ijazat hai agar koi kahani aur hai

By

han ijazat hai agar koi kahani aur hai
in katoron mein abhi thoda sa pani aur hai
mazhabi mazdur sab baithe hain in ko kaam do
ek imarat shahr mein kafi purani aur hai
khamushi kab chikh ban jae kise malum hai
zulm kar lo jab talak ye be-zabani aur hai
khushk patte aankh mein chubhte hain kanton ki tarah
dasht mein phirna alag hai baghbani aur hai
phir wahi uktahaten hongi badan chaupal mein
umr ke qisse mein thodi si jawani aur hai
bas isi ehsas ki shiddat ne budha kar diya
tute-phute ghar mein ek ladki siyani aur hai

duniya teri raunaq se main ab ub raha hun

By

duniya teri raunaq se main ab ub raha hun
tu chand mujhe kahti thi main dub raha hun
ab koi shanasa bhi dikhai nahin deta
barson main isi shahr ka mahbub raha hun
main khwab nahin aap ki aankhon ki tarah tha
main aap ka lahja nahin uslub raha hun
sachchai to ye hai ki tere qarya-e-dil mein
ek wo bhi zamana tha ki main khub raha hun
us shahr ke patthar bhi gawahi meri denge
sahra bhi bata dega ki majzub raha hun
duniya mujhe sahil se khadi dekh rahi hai
main ek jazire ki tarah dub raha hun
phenk aae the mujh ko bhi mere bhai kuen mein
main sabr mein bhi hazrat-e-ayyub raha hun