tel ke saudagar

By

bukhara samarqand ek khal-e-hindu ke badle!
baja hai bukhara samarqand baqi kahan hain?
bukhara samarqand nindon mein madhosh
ek nil-gun khamushi ke hijabon mein mastur
aur rahrawon ke liye un ke dar band
soi hui mah-jabinon ki palkon ke manind
rusi hama-ust ke taziyanon se mazur
do mah-jabinen!
bukhara samarqand ko bhul jao
ab apne darakhshanda shahron ki
tahran o mashhad ke saqf o dar-o-baam ki fikr kar lo
tum apne nae daur-e-hosh-o-amal ke dil-awez chashmon ko
apni nai aarzuon ke in khub-surat kinayon ko
mahfuz kar lo!
in unche darakhshanda shahron ki
kotah fasilon ko mazbut kar lo
har ek burj-o-baro par apne nigahban chadha do
gharon mein hawa ke siwa
sab sadaon ki shamen bujha do!
ki bahar fasilon ke niche
kai din se rahzan hain khema-fagan
tel ke budhe sauda-garon ke libaade pahan kar
wo kal raat ya aaj ki raat ki tirgi mein
chale aaenge ban ke mehman
tumhaare gharon mein
wo dawat ki shab jam-o-mina ludhaenge
nachenge gaenge
be-sakhta qahqahon hamhamon se
wo garmaengee khun-e-mahfil!
magar pau phategi
to palkon se khodoge khud apne murdon ki qabren
bisat-e-ziyafat ki khakistar-e-sokhta ke kinare
bahaoge aansu!
bahae hain hum ne bhi aansu!
go ab khal-e-hindu ki arzish nahin hai
ezar-e-jahan par wo rista hua gahra nasur
afrang ki aaz-e-khun-khwar se ban chuka hai
bahae hain hum nai bhi aansu
hamari nigahon ne dekhe hain
sayyal sayon ke manind ghulte hue shahr
girte hue baam-o-dar
aur minar o gumbad
magar waqt minar hai
aur dushman ab us ki khamida kamar se guzarta hua
us ke nichle ufaq par ludhakta chala ja raha hai
hamare barahna o kahida jismon ne
wo qaid-o-band aur wo taziyane sahe hain
ki un se hamara sitamgar
khud apne alaw mein jalne laga hai!
mere hath mein hath de do!
mere hath mein hath de do!
ki dekhi hain mein ne
himala o alwand ki chotiyon par shuaen
unhin se wo khurshid phutega aakhir
bukhara samarqand bhi sal-ha-sal se
jis ki hasrat ke daryuza-gar hain!

tasawwuf

By

hum tasawwuf ke kharabon ke makin
waqt ke tul-e-alam-nak ke parwarda hain,
ek tarik azal nur-e-abad se khali!
hum jo sadiyon se chale hain
to samajhte hain ki sahil paya
apni din raat ki pa-kubi ka hasil paya
hum tasawwuf ke nihan-khanon mein basne wale
apni pamali ke afsanon pe hansne wale
hum samajhte hain nishan-e-sar-e-manzil paya

tamasha-gah-e-lala-zar

By

tamasha-gah-e-lala-zar
tiyatar pe meri nigahen jami thin
mere kan music ke zer-o-bam par lage the
magar mera dil phir bhi karta raha tha
arab aur ajam ke ghamon ka shumar
tamasha-gah-e-lala-zar!
tamasha-gah-e-lala-zar
ab iran kahan hai
ye ishqi ka shahkar iran ki rustakhez
ab iran hai ek nauhagar pir-zal
hai muddat se afsurda jis ka jamal
madain ki viraniyon par ajam ashk-rez
wo nau-sherwan aur zar-dusht aur dariyush
wo farhad shirin wo kai-khusro o kai-qabaad
hum ek dastan hain wo kirdar the dastan ke!
hum ek karwan hain wo salar the karwan ke!
tah-e-khak jin ke mazar
tamasha-gah-e-lala-zar!
tamasha-gah-e-lala-zar
magar nauha-khwani ki ye sargirani kahan tak?
ki manzil hai dushwar gham se gham-e-jawedan tak!
wo sab the kushada-dil o hosh-mand o parastar-e-rabb-e-karim
wo sab khair ke rah-dan rah-shanas
hamein aaj mohsin-kush o na-sipas
wo shahanshahan-e-azim
wo pindar-e-rafta ka jah-o-jalal-e-qadim
hamari hazimat ke sab be-baha tar-o-pu the
fana un ki taqdir hum un ki taqdir ke nauhagar hain
usi ki tamanna mein phir sogwar
tamasha-gah-e-lala-zar!
tamasha-gah-e-lala-zar
urus-e-jawan sal-e-farda hijabon mein mastur
gurisna nigah zud-karon se ranjur
magar ab hamare nae khwab kabus-e-mazi nahin hain
hamare nae khwab hain aadam-e-nau ke khwab
jahan-e-tag-o-dau ke khwab
jahan-e-tag-o-dau madain nahin
kakh-e-faghfur-o-kisra nahin
ye us aadam-e-nau ka maawa nahin
nai bastiyan aur nae shahryar
tamasha-gah-e-lala-zar!

talab ke tale

By

gul-o-yasman kal se na-ashna
kal se be-e'tina
gul-o-yasman apne jismon ki haiat mein fard
magar kal se na-ashna kal se be-e'tina
kasi marg-e-mubram ka dard
un ke dil mein nahin!
faqat apni tarikh ki be-sar-o-pa talab ke tale
hum dabe hain!
hum apne wajudon ki pinhan tahen
kholte tak nahin
aarzu bolte tak nahin!
ye tarikh meri nahin aur teri nahin
ye tarikh hai izhdiham-e-rawan
usi izhdiham-e-rawan ki ye tarikh hai
ye wo chikh hai
jis ki takrar apne man-o-tu mein hai
wo takrar jo apni tahzib ki hu mein hai
tujhe is pe hairat nahin
hum is izhdiham-e-rawan ke nishan-e-qadam par chale ja rahe hain
badhe ja rahe hain
ki hum zulmat-e-shab mein tanha
pade rah na jaen
badhe ja rahe hain
na jine ki khatir
na is se fuzun zinda rahne ki khatir
badhe ja rahe hain kisi aib se
rahzan-e-marg se bach nikalne ki khatir
judai ki khatir!
kisi fard ke khauf se badh rahe hain
jo baatin ke tute darichon ke pichhe
shararat se hansta chala ja raha hai

taaruf

By

ajal, in se mil,
ki ye sada-dil
na ahl-e-salat aur na ahl-e-sharab,
na ahl-e-adab aur na ahl-e-hisab,
na ahl-e-kitab
na ahl-e-kitab aur na ahl-e-mashin
na ahle-khala aur na ahl-e-zamin
faqat be-yaqin
ajal, in se mat kar hijab
ajal, in se mil!
badho, tum bhi aage badho
ajal se milo,
badho, nau-tawangar gadao
na kashkol-e-daryuza-gardi chhupao
tumhein zindagi se koi rabt baqi nahin
ajal se hanso aur ajal ko hansao
badho bandagan-e-zamana badho bandagan-e-diram
ajal ye sab insan manafi hain
manafi ziyaada hain insan kam
ho in par nigah-e-karam

sitare

By

nikal kar ju-e-naghma khuld-zar-e-mah-o-anjum se
faza ki wusaton mein hai rawan aahista aahista
ba-su-e-nauha-abaad-e-jahan aahista aahista
nikal kar aa rahi hai ek gulistan-e-tarannum se
sitare apne mithe madh-bhare halke tabassum se
kiye jate hain fitrat ko jawan aahista aahista
sunate hain use ek dastan aahista aahista
dayar-e-zindagi madhosh hai un ke takallum se
yahi aadat hai roz-e-awwalin se un sitaron ki
chamakte hain ki duniya mein masarrat ki hukumat hun
chamakte hain ki insan fikr-e-hasti ko bhula dale
liye hai ye tamanna har kiran un nur-paron ki
kabhi ye khak-dan gahwara-e-husn-o-latafat ho
kabhi insan apni gum-shuda jannat ko phir pa le