marsiya

By

udas yaadon ki muzmahil raat bit bhi ja
ki meri aankhon mein ab lahu hai na khwab koi
main sab diye taq-e-arzu ke bujha chuka hun
tu hi bata ab
ki marg-e-mahtab o khun-e-anjum pe nazr kya dun
na mera mazi na mera farda
bikhar gai thi jo zulf kab ki sanwar chuki hai
aur aane wali sahar bhi aa kar guzar chuki hai
udas yaadon ki muzmahil raat bit bhi ja!

main zinda hun

By

aakhiri raat thi wo
main ne dil se ye kaha
harf jo likkhe gae
aur jo zaban boli gai
sabhi be-kar gae
main bhi ab haar gaya yar bhi sab haar gae
koi chaara nahin juz-tark-e-talluq ai dil
ek sada aur sahi aakhiri bar
jism se chheda use ruh se chhu le use
aakhiri bar bahe saz-e-badan se koi naghma koi lai
aakhiri raat hai ye
aakhiri bar hai ye zaiqa-e-bosa-o-lams
aakhiri bar chhalak jae lahu
garmi-e-jaan se mahak jae nafas ki khushbu
khwab mein khwab ke manind utar ja ai dil
aakhiri raat thi wo
phir guzar ku-e-nadamat se hua to dekha
baam raushan hai jo tha
aur darwaze pe dastak hai wahi
mera qatil dar-o-diwar pe kuchh naqsh banata hai abhi
ungliyan khun se tar dil-e-kam-zarf ko hai wahama-e-arz-e-hunar
din ki har baat hui be-tauqir
raat hai aur zamir
chashm hai muntazir-e-khwab-e-digar
khwab aate hain thaharte hain chale jate hain
aur qatil ki saza ye bhi ki main zinda hun

ideal

By

meri aankhon mein koi chehra charagh-e-arzu
wo mera aaina jis se khud jhalak jaun kabhi
aisa mausam jaise mai pi kar chhalak jaun kabhi
ya koi hai khwab
jo dekha tha lekin phir mujhe
yaad karne par bhi yaad aaya na tha
dil ye kahta hai wahi hai hu-ba-hu
jis ko dekha tha kabhi aur samne paya na tha
guftugu us se hai aur hai ru-ba-ru
khwab ho jae na lekin guftugu
meri aankhon mein koi chehra charagh-e-arzu

dua dua chehra

By

dua dua wo chehra
haya haya wo aankhen
saba saba wo zulfen
chale lahu gardish mein
rahe aankh mein dil mein
base mere khwabon mein
jale akele-pan mein
mile har ek mahfil mein
dua dua wo chehra
kabhi kisi chilman ke pichhe
kabhi darakht ke niche
kabhi wo hath pakadte
kabhi hawa se darte
kabhi wo barish andar
kabhi wo mauj samundar
kabhi wo suraj dhalte
kabhi wo chand nikalte
kabhi khayal ki rau mein
kabhi charagh ki lau mein
dua dua wo chehra
kabhi baal sukhae aangan mein
kabhi mang nikale darpan mein
kabhi chale pawan ke panw mein
kabhi hanse dhup mein chhanw mein
kabhi pagal pagal nainon mein
kabhi chhagal chhagal sinon mein
kabhi phulon phul wo thaali mein
kabhi diyon bhari diwali mein
kabhi saja hua aaine mein
kabhi dua bana wo zine mein
kabhi apne-ap se jangon mein
kabhi jiwan mauj-tarangon mein
kabhi naghma nur-fazaon mein
kabhi maula huzur duaon mein
kabhi ruke hue kisi lamhe mein
kabhi dukhe hue kisi chehre mein
wahi chehra bolta rahta hun
wahi aankhen sochta rahta hun
wahi zulfen dekhta rahta hun
dua dua wo chehra
haya haya wo aankhen
saba saba wo zulfen

alfaz

By

ye lafz suqraat lafz isa
main in ka khaliq ye mere khaliq
yahi azal hain yahi abad hain yahi zaman hain yahi makan hain
ye zehn-ta-zehn rah-guzar hain ye ruh-ta-ruh ek safar hain
sadaqat-e-asr bhi yahi hain karahat-e-jabr bhi yahi hain
alamat-e-dard bhi yahi hain karamat-e-sabr bhi yahi hain
baghair tafriq-e-rang-o-mazhab zamin zamin in ki baadshahi
khinche hue hain lahu lahu mein bichhe hue hain zaban zaban par
ye jhut bhi hain ye lut bhi hain ye jang bhi hain ye khun bhi hain
magar ye majburiyan hain in ki
baghair in ke hayat sari tawahhumati
har ek harakat sukut thahre
na kah saken kuchh na sun saken kuchh
har ek aaina apni akkasiyon pe hairan ho aur chup ho
nigah-e-nazzara-bin tamasha ho wahshaton ka
ijazat-e-jalwa de ke jaise zaban se goyai chhin li jae
na husn kuchh ho na ishq kuchh ho
tamam ehsas ki hawaen tamam irfan ke jazire tamam ye ilm ke samundar
sarab hon wahm hon guman hon
ye lafz tesha hain jin se afkar apni surat tarashte hain
masih-e-dast-o-qalam se niklen to phir ye alfaz bolte hain
yahi musawwir yahi hain but-gar yahi hain shaer
yahi mughanni yahi nawa hain
yahi payambar yahi khuda hain
main kimiya hun ye kimiya-gar
ye mera kalyan chahte hain
main in ki taskhir kar raha hun
ye meri tamir kar rahe hain

aaina

By

main aaina hun
aur har aane wale ko wahi chehra dikhata hun
jo mere samne lae
magar ab thak gaya hun
chahta hun
koi mujh ko is tarah dekhe
ki chakna-chur ho jaun