humne khulne na diya be-sar-o-samani ko

hum ne khulne na diya be-sar-o-samani ko
kahan le jaen magar shahr ki virani ko
sirf guftar se zakhmon ka rafu chahte hain
ye siyasat hai to phir kya kahin nadani ko
koi taqsim nai kar ke chala jata hai
jo bhi aata hai mere ghar ki nigahbani ko
ab kahan jaun ki ghar mein bhi hun dushman apna
aur bahar mera dushman hai nigahbani ko
be-hisi wo hai ki karta nahin insan mahsus
apni hi ruh mein aai hui tughyani ko
aaj bhi us ko faraaz aaj bhi aali hai wahi
wahi sajda jo kare waqt ki sultani ko
aaj yusuf pe agar waqt ye lae ho to kya
kal tumhin takht bhi doge isi zindani ko
subh khalne ki ho ya sham bikhar jaane ki
hum ne khushbu hi kiya apni pareshani ko
wo bhi har-an naya meri mohabbat bhi nai
jalwa-e-husn kashish hai meri hairani ko
kuza-e-harf mein laya hun tumhaari khatir
ruh par utre hue ek ajab pani ko

har aawaz zamistani hai har jazba zindani hai

har aawaz zamistani hai har jazba zindani hai
kucha-e-yar se dar-o-rasan tak ek si hi virani hai
kitne koh-e-giran kate tab subh-e-tarab ki did hui
aur ye subh-e-tarab bhi yaro kahte hain begani hai
jitne aag ke dariya mein sab par hamin ko karna hain
duniya kis ke sath aai hai duniya to diwani hai
lamha lamha khwab dikhae aur sau sau tabir kare
lazzat-e-kam-azar bahut hai jis ka nam jawani hai
dil kahta hai wo kuchh bhi ho us ki yaad jagae rakh
aql ye kahti hai ki tawahhum par jina nadani hai
tere pyar se pahle kab tha dil mein aisa soz-o-gudaz
tujh se pyar kiya to hum ne apni qimat jaani hai
aap bhi kaise shahar mein aa kar shair kahlae hain 'alim'
dard jahan kamyab bahut hai naghmon ki arzani hai

hanso to rang hun chehre ka rowo to chashm-e-nam mein hun

hanso to rang hun chehre ka rowo to chashm-e-nam mein hun
tum mujh ko mahsus karo to har mausam mein hun
chaha tha jise wo mil bhi gaya par khwab bhare hain aankhon mein
ai mere lahu ki lahar bata ab kaun se main aalam mein hun
log mohabbat karne wale dekhenge taswir apni
ek shua-e-awara hun aaina-e-shabnam mein hun
us lamhe to gardish-e-khun ne meri ye mahsus kiya
jaise sar pe zamin uthae ek raqs-e-paiham mein hun
yar mera zanjiren pahne aaya hai bazaron mein
main ki tamasha dekhne wale logon ke matam mein hun
jo likkhe wo khwab mere ab aankhon aankhon zinda hain
jo ab tak nahin likh paya main un khwabon ke gham mein hun

guzro na is tarah ki tamasha nahin hun main

guzro na is tarah ki tamasha nahin hun main
samjho ki ab hun aur dobara nahin hun main
ek taba rang rang thi so nazr-e-gul hui
ab ye ki apne sath bhi rahta nahin hun main
tum ne bhi mere sath uthae hain dukh bahut
khush hun ki rah-e-shauq mein tanha nahin hun main
pichhe na bhag waqt ki ai na-shanas dhup
sayon ke darmiyan hun saya nahin hun main
jo kuchh bhi hun main apni hi surat mein hun 'alim'
'ghaalib' nahin hun 'mir'-o-'yagana' nahin hun main

dil hi the hum dukhe hue tumne dukha liya to kya

dil hi the hum dukhe hue tum ne dukha liya to kya
tum bhi to be-aman hue hum ko sata liya to kya
aap ke ghar mein har taraf manzar-e-mah-o-aftab
ek charagh-e-sham agar main ne jala liya to kya
bagh ka bagh aap ki dastaras-e-hawas mein hai
ek gharib ne agar phul utha liya to kya
lutf ye hai ki aadmi aam kare bahaar ko
mauj-e-hawa-e-rang mein aap naha liya to kya
ab kahin bolta nahin ghaib jo kholta nahin
aisa agar koi khuda tum ne bana liya to kya
jo hai khuda ka aadmi us ki hai saltanat alag
zulm ne zulm se agar hath mila liya to kya
aaj ki hai jo karbala kal pe hai us ka faisla
aaj hi aap ne agar jashn mana liya to kya
log dukhe hue tamam rang bujhe hue tamam
aise mein ahl-e-sham ne shahr saja liya to kya
padhta nahin hai ab koi sunta nahin hai ab koi
harf jaga liya to kya sher suna liya to kya

bahar ka dhan aata jata asal KHazana ghar mein hai

bahar ka dhan aata jata asal khazana ghar mein hai
har dhup mein jo mujhe saya de wo sachcha saya ghar mein hai
patal ke dukh wo kya jaanen jo sath pe hain milne wale
hain ek hawala dost mere aur ek hawala ghar mein hai
meri umr ke ek ek lamhe ko main ne qaid kiya hai lafzon mein
jo haara hun ya jita hun wo sab sarmaya ghar mein hai
tu nanha-munna ek diya main ek samundar andhiyara
tu jalte jalte bujhne laga aur phir bhi andhera ghar mein hai
kya swang bhare roti ke liye izzat ke liye shohrat ke liye
suno sham hui ab ghar ko chalo koi shakhs akela ghar mein hai
ek hijr-zada babul piyari tere jagte bachchon se haari
ai shaer kis duniya mein hai tu teri tanha duniya ghar mein hai
duniya mein khapae sal kai aakhir mein khula ahwal yahi
wo ghar ka ho ya bahar ka har dukh ka mudawa ghar mein hai