dukh nawishta hai to aandhi ko likha aahista

By

dukh nawishta hai to aandhi ko likha aahista
ai khuda ab ke chale zard hawa aahista aahista
khwab jal jaen meri chashm-e-tamanna bujh jae
bas hatheli se ude rang-e-hina aahista
zakhm hi kholne aai hai to ujlat kaisi
chhu mere jism ko ai baad-e-saba aahista
tutne aur bikharne ka koi mausam ho
phul ki ek dua mauj-e-hawa aahista
jaanti hun ki bichhadna teri majburi hai
par meri jaan mile mujh ko saza aahista
meri chahat mein bhi ab soch ka rang aane laga
aur tera pyar bhi shiddat mein hua aahista
nind par jal se padne lage aawazon ke
aur phir hone lagi teri sada aahista
raat jab phul ke rukhsar pe dhire se jhuki
chand ne jhuk ke kaha aur zara aahista

dua ka TuTa hua harf sard aah mein hai

By

dua ka tuta hua harf sard aah mein hai
teri judai ka manzar abhi nigah mein hai
tere badalne ke ba-wasf tujh ko chaha hai
ye e'tiraf bhi shamil mere gunah mein hai
azab dega to phir mujh ko khwab bhi dega
main mutmain hun mera dil teri panah mein hai
bikhar chuka hai magar muskura ke milta hai
wo rakh rakhao abhi mere kaj-kulah mein hai
jise bahaar ke mehman khali chhod gae
wo ek makan abhi tak makin ki chah mein hai
yahi wo din the jab ek dusre ko paya tha
hamari sal-girah thik ab ke mah mein hai
main bach bhi jaun to tanhai mar dalegi
mere qabile ka har fard qatl-gah mein hai

dil ka kya hai wo to chahega musalsal milna

By

dil ka kya hai wo to chahega musalsal milna
wo sitamgar bhi magar soche kisi pal milna
wan nahin waqt to hum bhi hain adim-ul-fursat
us se kya miliye jo har roz kahe kal milna
ishq ki rah ke musafir ka muqaddar malum
shahr ki soch mein ho aur use jangal milna
us ka milna hai ajab tarah ka milna jaise
dasht-e-ummid mein andeshe ka baadal milna
daman-e-shab ko agar chaak bhi kar lin to kahan
nur mein duba hua subh ka aanchal milna

dhup sat rangon mein phailti hai aankhon par

By

dhup sat rangon mein phailti hai aankhon par
barf jab pighalti hai us ki narm palkon par
phir bahaar ke sathi aa gae thikanon par
surkh surkh ghar nikle sabz sabz shakhon par
jism o jaan se utregi gard pichhle mausam ki
dho rahi hain sab chidiyan apne pankh chashmon par
sari raat sote mein muskura raha tha wo
jaise koi sapna sa kanpta tha honton par
titliyan pakadne mein dur tak nikal jaana
kitna achchha lagta hai phul jaise bachchon par
lahr lahr kirnon ko chhed kar guzarti hai
chandni utarti hai jab sharir jharnon par

bichhDa hai jo ek bar to milte nahin dekha

By

bichhda hai jo ek bar to milte nahin dekha
is zakhm ko hum ne kabhi silte nahin dekha
ek bar jise chat gai dhup ki khwahish
phir shakh pe us phul ko khilte nahin dekha
yak-lakht gira hai to jaden tak nikal aain
jis ped ko aandhi mein bhi hilte nahin dekha
kanton mein ghire phul ko chum aaegi lekin
titli ke paron ko kabhi chhilte nahin dekha
kis tarah meri ruh hari kar gaya aakhir
wo zahr jise jism mein khilte nahin dekha

baja ki aankh mein nindon ke silsile bhi nahin

By

baja ki aankh mein nindon ke silsile bhi nahin
shikast-e-khwab ke ab mujh mein hausle bhi nahin
nahin nahin ye khabar dushmanon ne di hogi
wo aae aa ke chale bhi gae mile bhi nahin
ye kaun log andheron ki baat karte hain
abhi to chand teri yaad ke dhale bhi nahin
abhi se mere rafugar ke hath thakne lage
abhi to chaak mere zakhm ke sile bhi nahin
khafa agarche hamesha hue magar ab ke
wo barhami hai ki hum se unhen gile bhi nahin