adakari mein bhi sau karb ke pahlu nikal aae

By

adakari mein bhi sau karb ke pahlu nikal aae
ki fankarana rote the magar aansu nikal aae
hamein apni hi jaanib ab safar aaghaz karna hai
so misl-e-nikhat-e-gul ho ke be-qabu nikal aae
yahi be-nam paikar husn ban jaenge farda ka
sukhan mahke agar kuchh ishq ki khushbu nikal aae
isi ummid par hum qatl hote aae hain ab tak
ki kab qatil ke parde mein koi dil-ju nikal aae
samajhte the ki mahjuri ki zulmat hi muqaddar hai
magar phir us ki yaadon ke bahut jugnu nikal aae
dilon ko jit lena is qadar aasan hi kab tha
magar ab shobade hain aur bahut jadu nikal aae
safar ki intiha tak ek taza aas baqi hai
ki main ye mod katun us taraf se tu nikal aae

ab harf-e-tamanna ko samaat na milegi

By

ab harf-e-tamanna ko samaat na milegi
bechoge agar khwab to qimat na milegi
tashhir ke bazar mein ai taza kharidar
zebaishen mil jaengi qamat na milegi
lamhon ke taaqub mein guzar jaengi sadiyan
yun waqt to mil jaega mohlat na milegi
socha hi na tha yun bhi use yaad rakhenge
jab us ko bhulane ki bhi fursat na milegi
ta-umr wahi kar-e-ziyan ishq raha yaad
haalanki ye malum tha ujrat na milegi
tabir nazar aane lagi khwab ki surat
ab khwab hi dekhoge bashaarat na milegi
aaina-sifat waqt tera husn hain hum log
kal aaine tarsenge to surat na milegi