be-dili se hansne ko KHush-dili na samjha jae

By

be-dili se hansne ko khush-dili na samjha jae
gham se jalte chehron ko raushni na samjha jae
gah gah wahshat mein ghar ki samt jata hun
is ko dasht-e-hairat se wapsi na samjha jae
lakh khush-guman duniya bahami talluq ko
dosti kahen lekin dosti na samjha jae
hum to bas ye kahte hain rose jine marne ko
aap chahen kuchh samjhen zindagi na samjha jae
khak karne walon ki kya ajib khwahish thi
khak hone walon ko khak bhi na samjha jae

zindagi ne jhele hain sab azab duniya ke

By

zindagi ne jhele hain sab azab duniya ke
bas rahe hain aankhon mein phir bhi khwab duniya ke
dil bujhe to tariki dur phir nahin hoti
lakh sar pe aa pahunchen aaftab duniya ke
dasht-e-be-niyazi hai aur main hun ab logo
is jagah nahin aate baryab duniya ke
main ne in hawaon se dastan-e-gham kah di
dekhte rahe hairan sab hijab duniya ke
dekhen chashm-e-hairan kya intikhab karti hai
main kitab-e-tanhai tum nisab duniya ke
hum ne dast-e-duniya par phir bhi ki nahin baiat
jaante the hum tewar hain kharab duniya ke

ghar ki jab yaad sada de to palaT kar aa jaen

By

ghar ki jab yaad sada de to palat kar aa jaen
kash hum apni hi khwahish ko mayassar aa jaen
hai karamat mere dil ki tere nawak mein nahin
war ho ek magar zakhm bahattar aa jaen
guftugu aaj to do tok karega suraj
zill-e-subhani shabistan se bahar aa jaen
shab ko yalghaar-e-tafakkur se jo bach niklun main
subh-dam taza khayalat ke lashkar aa jaen
itni saffak samaat bhi ghazab hai ki jahan
baat puri bhi na ho hathon mein patthar aa jaen

gham se bahal rahe hain aap aap bahut ajib hain

By

gham se bahal rahe hain aap aap bahut ajib hain
dard mein dhal rahe hain aap aap bahut ajib hain
saya-e-wasl kab se hai aap ka muntazir magar
hijr mein jal rahe hain aap aap bahut ajib hain
apne khilaf faisla khud hi likha hai aap ne
hath bhi mal rahe hain aap aap bahut ajib hain
waqt ne aarzu ki lau der hui bujha bhi di
ab bhi pighal rahe hain aap aap bahut ajib hain
daera-war hi to hain ishq ke raste tamam
rah badal rahe hain aap aap bahut ajib hain
apni talash ka safar khatm bhi kijiye kabhi
khwab mein chal rahe hain aap aap bahut ajib hain

ek se silsile hain sab hijr ki rut bata gai

By

ek se silsile hain sab hijr ki rut bata gai
phir wahi subh aaegi phir wahi sham aa gai
mere lahu mein jal uthe utne hi taza-dam charagh
waqt ki sazishi hawa jitne diye bujha gai
main bhi ba-pas-e-dostan apne khilaf ho gaya
ab yahi rasm-e-dosti mujh ko bhi ras aa gai
tund hawa ke jashn mein log gae to the magar
tan se koi qaba chhini sar se koi rida gai
dil-zadagan ke qafile dur nikal chuke tamam
un ki talash mein nigah ab jo gai to kya gai
aakhir-e-shab ki dastan aur karen bhi kya bayan
ek hi aah-e-sard thi sare diye bujha gai

dil agar kuchh mang lene ki ijazat mangta

By

dil agar kuchh mang lene ki ijazat mangta
ye mohabbat-zad tajdid-e-mohabbat mangta
waqt khud na-paedari ke liye mashhur hai
aise be-taufiq se main khak shohrat mangta
main ne sahra se tahayyur-khez hairat mang li
khak ho jata agar tahzib-e-wahshat mangta
dil ko khush aai nahin ye daulat-e-asudgi
aur kuchh mil jati to ye kuchh aur zahmat mangta
hain khudawandan-e-duniya hum tahi-daston se hech
dil ko hasrat thi to hum jaison se khilat mangta
ho gaya hota giran-goshon se gar maghlub main
kyun sukhan aaghaz karta kyun samaat mangta
kya tajjub tha ki is sauda-gari ke daur mein
khwab bhi tabir ho jaane ki qimat mangta