ghunche se muskura ke use zar kar chale

ghunche se muskura ke use zar kar chale
nargis ko aankh mar ke bimar kar chale
phirte ho bagh se to pukare hai andalib
subh-e-bahaar-e-gul pe shab-e-tar kar chale
uthte hue jo dair se li madrase ki rah
tasbih shaikh-e-shahr ki zunnar kar chale
aae jo bazm mein to utha chehre se naqab
parwane hi ko shama se bezar kar chale
aazad karte tum hamein qaid-e-hayat se
is ke ewaz jo dil ko giraftar kar chale
uth kar hamare pas se ghar tak raqib ke
pahunchega wo koi jo hamein mar kar chale
lo khush raho ghar apne mein jis shakl se ho tum
do chaar nale hum pas-e-diwar kar chale
andoh-o-dard-o-gham ne kiya azm jab idhar
hum ko adam se qafila-salar kar chale
'sauda' ne apne khun ki diyat tum se yak-nigah
chahi to itni baat se inkar kar chale
pyare khuda ke waste tuk apne dil ke bich
insaf to karo ye kise mar kar chale

gar kijiye insaf to ki zor wafa main

gar kijiye insaf to ki zor wafa main
khat aate hi sab chal gae ab aap hain ya main
tum jin ki sana karte ho kya baat hai un ki
lekin tuk idhar dekhiyo ai yar bhala main
rakhta hai kuchh aisi wo barahman bacha raftar
but ho gaya dhaj dekh ke jis ki ba-khuda main
yaro na bandhi us se kabhu shakl-e-mulaqat
milne ko to us shokh ke tarsa hi kiya main
jab main gaya us ke to use ghar mein na paya
aaya wo agar mere to dar khud na raha main
kaifiyyat-e-chashm us ki mujhe yaad hai 'sauda'
saghar ko mere hath se lijo ki chala main

ek humse tujhe nahin iKHlas

ek hum se tujhe nahin ikhlas
ghar-ba-ghar tujh ko har kahin ikhlas
ru-siyahi siwa nahin hasil
nam se mat kar ai nagin ikhlas
dekh tujh zulf o ru ki ulfat ko
karte hain aaj kufr o din ikhlas
zor hi hum se tin rakha pyare
wah-wa rahmat-afrin ikhlas
misl-e-naqsh-e-qadam ye rakhti hai
tere dar se meri jabin ikhlas
gar tamanna guhar ki hai to kar
chashm meri se aastin ikhlas
aadam is dam mein phansa 'sauda'
rakkhe dane se khosha-chin ikhlas

dil mein tere jo koi ghar kar gaya

dil mein tere jo koi ghar kar gaya
sakht muhim thi ki wo sar kar gaya
wahm-e-ghalat-kar ne dil khush kiya
kis pe na jaane wo nazar kar gaya
ja hi bhida tujh saf-e-mizhgan se yar
dil to mera zor-e-jigar kar gaya
raat mila tha mujhe tanha raqib
yar khuda ka hi main dar kar gaya
faiz tere wasf-e-buna-gosh ka
apne sukhan ko to guhar kar gaya
dekh li saqi ki bhi dariya-dili
lab na hamare kabhu tar kar gaya
kyun ke karahun na shab o roz mein
dard mere pahlu mein ghar kar gaya
nafa ko pahuncha ye tujhe de ke dil
jaan ka apni mein zarar kar gaya
aur ghazal ab koi sauda tu kah
ye to yunhi thi main nazar kar gaya

dil le ke hamara jo koi talib-e-jaan hai

dil le ke hamara jo koi talib-e-jaan hai
hum bhi ye samajhte hain ki ji hai to jahan hai
har ek ke dukh-dard ka ab zikr-o-bayan hai
mujh ko bhi ho rukhsat mere bhi munh mein zaban hai
is ishq ke hai tu hi saza-war ki har ek
dil de ke tere nam ko juya-e-nishan hai
juinda-e-har-chiz hai yabinda jahan mein
juz umr-e-guzishta ki wo dhundo to kahan hai
piri jo tu jawe to jawani se ye kahna
khush rahiyo mari jaan tu jidhar hai jahan hai
pahuncha na koi murgh kabhu apne chaman tak
juz tair-e-hasrat ki wo yan baal-fishan hai
tujh se to kisu tarah mera kuchh nahin chalta
juz khun ki aankhon se shab o roz rawan hai
saqi tu nazar kijiyo tuk subh-e-chaman ko
is pir ke jalwe ka bhala koi jawan hai
'sauda' ka tere dasht mein tiflan se hai ye haal
jidhar wo khada howe to jun sang-e-nishan hai

din shaiKH o barhaman ne kiya yar faramosh

din shaikh o barhaman ne kiya yar faramosh
ye subha faramosh wo zunnar faramosh
dekha jo haram ko to nahin dair ki wusat
is ghar ki faza kar gaya meamar faramosh
bhule na mere dil se mera misra-e-jaan-kah
nala na kare murgh-e-giraftar faramosh
dil se na gai aah hawas sair-e-chaman ki
aur hum ne kiya rakhna-e-diwar faramosh
ya nala hi kar mana tu ya girye ko naseh
do chiz na aashiq se ho yak-bar faramosh
bhula phirun hun aap ko ek umr hai lekin
tujh ko na kiya dil se main zinhaar faramosh
dil dard se kis tarah mera khali ho 'sauda'
wo nashunaw-e-harf mein guftar faramosh