gham-e-firaq mai o jam ka KHayal aaya

By

gham-e-firaq mai o jam ka khayal aaya
safed baal liye sar pe ek wabaal aaya
milega ghair bhi un ke gale ba-shauq ai dil
halal karne mujhe id ka hilal aaya
agar hai dida-e-raushan to aaftab ko dekh
udhar uruj hua aur idhar zawal aaya
lutae dete hain in motiyon ko dida-e-shauq
bhar aae ashk ki muflis ke hath mal aaya
lagi nasim-e-bahaari jo marifat gane
gulon pe kuchh nahin mauquf sab ko haal aaya
payam-bar ko abas de ke khat udhar bheja
gharib aur wahan se shikasta-haal aaya
khuda khuda karo ai 'shad' is pe nakhwat kya
jo shairi tumhein aai to kya kamal aaya

faqat shor-e-dil-e-pur-arzu tha

By

faqat shor-e-dil-e-pur-arzu tha
na apne jism mein hum the na tu tha
har ek ke panw par jhukte kati umr
na samjhe hum ki kis qalib mein tu tha
jahan pahunche usi ka nur paya
jidhar dekha wahi khurshid-ru tha
jagah daman mein apne kyun na dete
ki tifl-e-ashk apna hi lahu tha
kahun kya dil ki main nazuk-mizaji
khuda bakhshe nihayat tund-khu tha
main kaifiyyat kahun kya bazm-e-mai ki
ki mina hath mein aankhon mein tu tha
ghash aaya us ne tauli tegh jab jab
ajab halka hamara bhi lahu tha
bahut dhunda kahin paya na hum ne
bata de ye ki kis goshe mein tu tha
bacha qatil ka daman lillahil-hamd
bahut khaula hua apna lahu tha
udu the saqiya sab mai-kade mein
yahi ek aas thi palle pe tu tha
libas-e-kuhna jab tha apna sad-chaak
to phir bekar paiwand o rafu tha
ghazab mein aa ke tujh ko todta shaikh
natija bahas ka kya ai subu tha
teri taswir the hum bhi kisi waqt
yahi naqsha hamara hu-ba-hu tha
nazar mein hech tha kaunain saqi
labaalab jam tha hum the subu tha
saza laghzish ki pate bazm mein hum
khuda ko khair karna tha ki tu tha
hum apne hosh mein baqi the har tarah
magar jab tu hamare ru-ba-ru tha
tujhi se munh phula lete ajab kya
saba ghunchon ka bhi aakhir numu tha
chale hum bagh se ai 'shad' kis waqt
bahaar aane ko thi gul ka numu tha

ek sitam aur lakh adaen uf ri jawani hae zamane

By

ek sitam aur lakh adaen uf ri jawani hae zamane
tirchhi nigahen tang qabaen uf ri jawani hae zamane
hijr mein apna aur hai aalam abr-e-bahaaran dida-e-pur-nam
zid ki hamein wo aap bulaen uf ri jawani hae zamane
apni ada se aap jhijakna apni hawa se aap khatakna
chaal mein laghzish munh mein hayaen uf ri jawani hae zamane
hath mein aadi tegh pakadna taki lage bhi zakhm to ochha
qasd ki phir ji bhar ke sataen uf ri jawani hae zamane
kali ghataen bagh mein jhule dhani dupatte lat jhatkae
mujh pe ye qadghan aap na aaen uf ri jawani hae zamane
pichhle pahar uth uth ke namazen nak ragadni sajdon pe sajde
jo nahin jaez us ki duaen uf ri jawani hae zamane
'shad' na wo didar-parasti aur na wo be-nashsha ki masti
tujh ko kahan se dhundh ke laen uf ri jawani hae zamane

DhunDoge agar mulkon mulkon milne ke nahin nayab hain hum

By

dhundoge agar mulkon mulkon milne ke nahin nayab hain hum
jo yaad na aae bhul ke phir ai ham-nafaso wo khwab hain hum
main hairat o hasrat ka mara khamosh khada hun sahil par
dariya-e-mohabbat kahta hai aa kuchh bhi nahin payab hain hum
ho jae bakheda pak kahin pas apne bula len behtar hai
ab dard-e-judai se un ki ai aah bahut betab hain hum
ai shauq bura is wahm ka ho maktub tamam apna na hua
wan chehre pe un ke khat nikla yan bhule hue alqab hain hum
kis tarah tadapte ji bhar kar yan zoaf ne mushkin kas din hain
ho band aur aatish par ho chadha simab bhi wo simab hain hum
ai shauq pata kuchh tu hi bata ab tak ye karishma kuchh na khula
hum mein hai dil-e-betab nihan ya aap dil-e-betab hain hum
lakhon hi musafir chalte hain manzil pe pahunchte hain do ek
ai ahl-e-zamana qadr karo nayab na hon kam-yab hain hum
murghan-e-qafas ko phulon ne ai 'shad' ye kahla bheja hai
aa jao jo tum ko aana ho aise mein abhi shadab hain hum

ai but jafa se apni liya kar wafa ka kaam

By

ai but jafa se apni liya kar wafa ka kaam
bandon ke kaam aa ki yahi hai khuda ka kaam
kis ja tha qasd shauq ne pahuncha diya kidhar
kahte na the thagon se na le rahnuma ka kaam
kahta hai dil suna mujhe gesu ki dastan
aaj us ne sar pe dal diya hai bala ka kaam
tasir ko na aah se puchhun to kya karun
kyun khud utha liya dil-e-be-muddaa ka kaam
apni si tu to kar unhen phir ikhtiyar hai
sunna hai un ka kaam pahunchna dua ka kaam
sine mein dagh khilte hi jate hain har nafas
ab apni sans karti hai baad-e-saba ka kaam
musa faqat na the tere aaina-daron mein
isa bhi karte the lab-e-mojiz-numa ka kaam
har raat apni aankhon ko rona hai farz-e-ain
taat-guzar karte hain jaise khuda ka kaam
tha bhi zalil husn ki sarkar mein ye dil
kam-bakht ko supurd hua iltija ka kaam
ai 'shad' meri sakht-zabani pe hai khamosh
naseh bhi ab to karne laga ambiya ka kaam

agar marte hue lab par na tera nam aaega

By

agar marte hue lab par na tera nam aaega
to main marne se dar-guzra mere kis kaam aaega
use bhi than rakh saqi yaqin hoga na rindon ko
agar zahid pahan kar jama-e-ehram aaega
shab-e-furqat mein dard-e-dil se main us waste khush hun
zaban par raat bhar rah rah ke tera nam aaega
lagi ho kuchh to qasid aakhir is kam-bakht dil mein bhi
wahan teri tarah jo jaega nakaam aaega
isi ummid mein bandhe hue hain taktaki mai-kash
kaf-e-nazuk pe saqi rakh ke ek din jam aaega
yahan apni padi hai tujh se ai gham-khwar kya uljhun
ye kaun aaram hai mar jaun tab aaram aaega
zahe izzat jo ho is bazm mein mazkur ai waiz
bala se gar gunahgaron mein apna nam aaega
hazar inkar ya qat-e-talluq us se kar naseh
magar hir-phir ke honton par usi ka nam aaega
ata ki jab ki khud pir-e-mughan ne pi bhi le zahid
ye kaisa sochna hai tujh pe kyun ilzam aaega
pada hai silsila taqdir ka sayyaad ke bas mein
chaman mein ai saba kyunkar asir-e-dam aaega
koi badmast ko deta hai saqi bhar ke paimana
tera kya jaega mujh par abas ilzam aaega
unhen dekhegi tu ai chashm-e-hasrat wasl mein ya main
tere kaam aaega rona ki mere kaam aaega
hamesha kya piyunga main isi kohna-sifali main
mere aage kabhi to saghar-e-zarfam aaega
kahan se laun sabr-e-hazrat-e-ayyub ai saqi
khum aaega surahi aaegi tab jam aaega
chhuri thi kund teri ya tere qatil ki o bismil
tadap bhi tu teri gardan pe kyun ilzam aaega
yahi kah kar ajal ko qarz-khwahon ki tarah tala
ki le kar aaj qasid yar ka paigham aaega
hamesha kya yun hi qismat mein hai ginti gina dena
koi nala na lab par laiq-e-anjam aaega
gali mein yar ki ai 'shad' sab mushtaq baithe hain
khuda jaane wahan se hukm kis ke nam aaega