ye duniya hai yahan dil ko lagana kis ko aata hai

ye duniya hai yahan dil ko lagana kis ko aata hai
hazaron pyar karte hain nibhana kis ko aata hai
ye duniya hai yahan dil mein samana kis ko aata hai
mitane wale lakhon hain banana kis ko aata hai
nigahen pher lin tum ne to hum kis ki taraf dekhen
tumhi kah do mohabbat ka fasana kis ko aata hai
wafa ka yun to dam bharte hain is duniya mein sab lekin
wafa ke nam par mit kar dikhana kis ko aata hai

wo yun kho ke mujhe paya karenge

wo yun kho ke mujhe paya karenge
mera afsana dohraya karenge
sitam apne jo yaad aaya karenge
to dil hi dil mein pachhtaya karenge
ghurur-e-husn ko baatil samajh kar
sarapa ishq ban jaya karenge
na hogi tab-e-zabt-e-gham jab un ko
yaqinan ashk bhar laya karenge
qayamat hongi nazuk dil ki aahen
har ek zarre ko tadpaya karenge
falak matam karega be-kasi par
mah-o-anjum taras khaya karenge
mujhe har gam par thukrane wale
mujhi par naz farmaya karen
na hogi jab sukun ki koi surat
kuchh apne dil ko samjhaya karenge
har ek tadbir jab nakaam hogi
to mujh ko ru-ba-ru paya karenge
nigahon se mila kar wo nigahen
yakayak rukh badal jaya karenge
wahi naz-o-ada ki shakl hogi
isi surat se sharmaya karenge
main kahta hi rahunga qissa-e-gham
wo sunte sunte so jaya karenge
magar jab hoga aalam aalam-e-khwab
na pa kar mujh ko ghabraya karenge
'shakil' apne liye lamhat-e-fursat
payam-e-nau-ba-nau laya karenge

wo dil mein rahte hain dil ka nishan nahin malum

wo dil mein rahte hain dil ka nishan nahin malum
makin dhund raha hun makan nahin malum
sukun pane laga hun gham-e-mohabbat mein
kahan gain meri be-tabiyan nahin malum
masarraton ka to sathi mutala hai magar
gham-e-hayat ki gahraiyan nahin malum
fughan nasib ki waraftagi are tauba
fughan nasib ko wajh-e-fughan nahin malum
chaman ki fikr bhi kar aashiyan ki fikr ke sath
kidhar ko tut paden bijliyan nahin malum
wafa-shiar tahi-dast aae manzil par
kahan kahan pe luta karwan nahin malum
'shakil' aaina hai daur-e-inqilab magar
maal-e-qismat-e-hindostan nahin malum

uThi phir dil mein ek mauj-e-shabab aahista aahista

uthi phir dil mein ek mauj-e-shabab aahista aahista
kuchh aaya zindagi mein inqalab aahista aahista
sama kar mujh mein wo jaan-e-shabab aahista aahista
bana dega mujhe apna jawab aahista aahista
ye mahfil zahidan-e-khushk ki mahfil hai ai rindo
zara is bazm mein zikr-e-sharab aahista aahista
meri nazren mujhi ko rafta rafta bhul jati hain
hue jate hain jalwe kaamyab aahista aahista
na kahiye han na kahiye aap ko mujh se mohabbat hai
nigahen khud hi de dengi jawab aahista aahista
'shakil' is darja mayusi shuru-e-ishq mein kaisi
abhi to aur hona hai kharab aahista aahista

un se ummid-e-ru-numai hai

un se ummid-e-ru-numai hai
kya nigahon ki maut aai hai
husn masruf-e-khud-numai hai
ishq ka daur ibtidai hai
dil ne gham se shikast khai hai
umr-e-rafta teri duhai hai
dil ki barbaadiyon pe nazan hun
fath pa kar shikast khai hai
mere mabad nahin hain dair-o-haram
ehtiyatan jabin jhukai hai
wo hawa de rahe hain daman ki
hae kis waqt nind aai hai
khul gaya un ki aarzu mein ye raaz
zist apni nahin parai hai
shama parwana hon ki ghuncha-o-gul
zindagi kis ko ras aai hai
gul fasurda chaman udas 'shakil'
yun bhi aksar bahaar aai hai

un ko sharh-e-gham sunai jaegi

un ko sharh-e-gham sunai jaegi
aag pani mein lagai jaegi
khinch ke dekhenge kisi se ek bar
yun bhi qismat aazmai jaegi
teri nazron mein hai jo tasir jazb
ab mere nalon mein pai jaegi
meri subh-e-zindagi ki ek jhalak
dubte taron mein pai jaegi
aap hi kahiye ki mauj-e-iztirab
aap se kyunkar chhupai jaegi
raaz rakh raaz-e-mohabbat ai 'shakil'
ye ghazal mahfil mein gai jaegi