zalzala

By

ek shab halki si jumbish mujhe mahsus hui
main ye samjha mere shanon ko hilata hai koi
aankh uthai to ye dekha ki zamin hilti hai
jis jagah shai koi rakkhi hai wahin hilti hai
sahn-o-diwar ki jumbish hai to dar hilte hain
bahar aaya to ye dekha ki shajar hilte hain
koi shai jumbish-e-paiham se nahin hai mahrum
ek taqat hai pas-e-parda magar na-malum
chand lamhe bhi ye nairangi-e-alam na rahi
zalzala khatm hua jumbish-e-paiham na rahi
hairat-e-did se angusht-ba-dandan tha main
shahid-e-jalwa-e-qahhaari-e-yazdan tha main
dafatan ek sada aah-o-fughan ki aai
mere allah ye ghadi kis pe musibat lai
gul kiya zalzala-e-qahr ne kis ghar ka charagh
kis pe dhaya ye sitam kis ko diya hijr ka dagh
ja ke nazdik ye nazzara-e-hirman dekha
ek hasina ko ba-sad haal-e-pareshan dekha
baizawi shakl mein the husn ke jalwe pinhan
aankh mein sehr bhara tha magar aansu the rawan
main ne ghabra ke ye puchha ki ye haalat kyun hai
teri hasti hadaf-e-ranj-o-musibat kyun hai
boli ai shaer-e-rangin-tabiat mat puchh
roz-o-shab dil pe guzarti hai qayamat mat puchh
log duniya ko teri mujh ko zamin kahte hain
ahl-e-zar mujh ko mohabbat mein hasin kahte hain
main unhin husn-paraston ki hun tadpai hui
tujh se kahne ko ye raaz aai hun ghabrai hui
zar-paraston se hain bad-dil meri duniya ke gharib
hain giraftar-e-salasil meri duniya ke gharib
mujh se ye taza balaen nahin dekhi jati
zalimon ki ye jafaen nahin dekhi jatin
chahti hun mere ushshaq mein kuchh farq na ho
muft mein kashti-e-ehsas-e-wafa gharq na ho
ek wo jis ko mayassar hon imaraat-o-naqib
ek wo jis ko na ho phuns ka chhappar bhi nasib
sahab-e-daulat-o-zi-rutba-o-zardar ho ek
be-nawa gham-zada-o-bekas-o-lachaar ho ek
ek mukhtar ho, aurang-e-jahanbani ka
ek muraqqa ho gham-o-ranj-o-pareshani ka
sakht nafrat hai mujhe apne parastaron se
chhin lete hain mujhe mere talab-garon se
chira-dasti ka mita deti hain sab jah-o-jalal
haif-sad-haif ki hail hai gharibon ka khayal
ye na hote to dikhati main qayamat ka saman
ye na hote to mitati main ghurur-e-insan
ek karwat mein badal deti nizam-e-alam
ek ishaare hi mein ho jati hai ye mahfil barham
ek tabassum se jahan barq-ba-daman hota
na ye aaraishen hotin na ye saman hota
har ada puchhti sarmaya-paraston ke mizaj
kuchh to farmaiye hazrat ki hain kis haal mein aaj
lakh-pati sankh-pati be-sar-o-saman hote
jaan bach jae bas is baat ke khwahan hote
barsar-e-khak nazar aate hain qasr-o-aiwan
ashk-e-khunin se mere aur bhi uthte tufan
meri aaghosh mein sab ahl-e-sitam aa jate
mere bartaw se bas nak mein dam aa jate
baz ke munh gham-e-alam se kale karti
baz ko maut ki dewi ke hawale karti
khun-e-zardar hi mazdur ki mazduri hai
main jo khamosh hun ye bais-e-majburi hai
meri aaghosh mein jabir bhi hain majbur bhi hain
mere daman hi se wabasta ye mazdur bhi hain
zabt karti hun jo gham aata hai sah jati hun
josh aata hai magar kanp ke rah jati hun

unki taswir dekh kar

By

aaj kya hai jo mila shokh nigahon ko qarar?
kya hua husn ki masum hayaon ka waqar
aaj kyun tum mujhe dekhe hi chale jate ho?
dafatan tut gaya kis liye bajta hua saz
kya hue naghme wo ab kyun nahin aati aawaz
aaj honton pe khamoshi hi khamoshi kyun hai?
khub tadbir nikali hai manane ki mujhe
aatish-e-soz-e-mohabbat mein jalane ki mujhe
bhole-bhaale ho to de do mere shikwon ka jawab
tum ne kya peshtar apna na banaya mujh ko
phir yakayak na nigahon se giraya mujh ko
ye agar jhut hai to munh se kaho chup kyun ho
tu ne ek dil ko mere dars-e-mohabbat na diya
aur phir jaan ke dagh-e-gham-e-furqat na diya
ye agar jhut hai to munh se kaho, chup kyun ho
tum ne kya mujh se kisi qism ka wada na kiya
ye agar jhut hai to munh se kaho, chup kyun ho?
de sake tum na mere ek bhi shikwe ka jawab
ab main samjha ki hai kya raaz-e-ba-daman-e-hijab
waqai tum ko nadamat hai jo khamosh ho tum
ya kisi parda-e-taswir mein ru-posh ho tum!

raqqasa-e-hayat se

By

phulon pe raqs aur na bahaaron pe raqs kar
gulzar-e-hast-e-bud mein kharon pe raqs kar
ho kar jumud-e-gulshan-e-jannat se be-niyaz
dozakh ke be-panah shararon pe raqs kar
sham-e-sahar fusun-e-tabassum, hayat-e-gul
fitrat ke in ajib nazaron pe raqs kar
tanzim-e-kaenat-e-junun ki hansi uda
ujde hue chaman ki bahaaron pe raqs kar
sahmi hui sada-e-dil-e-na-tawan na sun
bahki hui nazar ke ishaaron par raqs kar
jo mar ke ji rahe the tujhe un se kya gharaz
tu apne aashiqon ke mazaron pe raqs kar
har har ada ho ruh ki gahraiyon mein gum
yun rang-o-bu ki rah-guzaron pe raqs kar
tu apni dhun mein mast hai tujh ko batae kaun
teri zamin falak hai sitaron par raqs kar
is tarah raqs kar ki sarapa asar ho tu
koi nazar uthae to pesh-e-nazar ho tu

numaish-e-aligarh

By

shafaq naza mein le rahi thi sambhaala
andhere ka gham kha raha tha ujala
sitaron ke rukh se naqab uth rahi thi
fazaon se mauj-e-shabab uth rahi thi
mai-e-zindagi jam-e-mai-nosh mein thi
wo kaif-e-masarrat, wo lamhat-e-rangin
wo ehsas-e-masti wo jazbaat-e-rangin
wo pur-kaif aalam wo dilkash nazare
wo jalwon ke bahte hue khushk dhaare
wo namkin aaghaz-e-shab allah allah
numaish ki wo tab-o-tab allah allah
wo bab-e-muzammil pe jashn-e-charaghan
falak par hon jaise sitare darakhshan
fazaon mein gunje hue wo tarane
wo jaan-bakhsh naghme wo pur-lutf gane
wo har samt husn-o-latafat ki jaanen
wo aarasta saf suthri dukanen
kahin par hai nazzara karigari ka
kahin garm hotel hai peshawari ka
ba-qadr-e-sukun wo dilon ka bahalna
amiron gharibon ka yakja tahalna
numayan numayan wo yaran-e-college
wo ishrat-ba-daman jawanan-e-college
koi tez-dasti o chusti pe nazan
koi sehhat o tandurusti pe nazan
koi husn ki jalwa-rezi pe mail
koi shokh nazron ki tezi pe mail
idhar chashm-e-hairan ki nazzara-sazi
udhar husn walo ki jalwa-taraazi
khiraman khiraman wo ham-joliyon mein
nikalti hui mukhtalif toliyon mein
naqabon mein wo be-naqabi ka aalam
jo lata hai dil par kharabi ka aalam
kisi ka wo chehre se aanchal uthana
kisi ka kisi se nigahen churana
kabhi yak-ba-yak chalte chalte thaharna
nigahon se jalwon ki islah karna
kabhi ek tawajjoh dukanon ki jaanib
kabhi ek nazar naujawanon ki jaanib
tamasha gharaz kaamyab aa raha tha
numaish pe goya shabab aa raha tha
idhar hum bhi bazm-e-takhayyul saja kar
khade ho gae ek dukkan pe aa kar
nazar mil gai dafatan ek nazar se
dhadakne laga dil mohabbat ke dar se
idhar to nazar se jabin-saiyan thin
udhar se bhi kuchh himmat-afzaiyan thin
khalish dil ki donon ko tadpa gai thi
mohabbat ki manzil qarib aa gai thi
khayalat mein is taraf ek talatum
labon par udhar halka halka tabassum
nigahon se ahd-e-wafa ho raha tha
ishaaron se matlab ada ho raha tha
idhar ishq ke baam-o-dar saj rahe the
ghadi mein jo dekha to nau baj rahe the
yakayak jawan kuchh mere pas aae
jo the aastinon pe bille lagae
kaha itni taklif farmaiyega
numaish se tashrif le jaiyega
gharaz chal diye ghar ko majbur ho kar
mohabbat ke jalwon se mamur ho kar
hui jari rahi thi ajab haalat-e-dil
koi chhin le jaise padhte mein nowel
hum is tarah bab-e-muzammil se nikle
lahu jaise tute hue dil se nikle
bahar-e-haal ab bhi wahi hai numaish
nawed-e-tarab de rahi hai numaish
wahi jashn hai aur wahi zindagi hai
magar jaise har shai mein koi kami hai
are o nigahon pe chha jaane wali
mere dil ko rah rah ke yaad aane wali
teri tarah jalwa-numa hai numaish
tere husn ka aaina hai numaish
numaish mein teri latafat hai pinhan
numaish mein teri nazakat hai pinhan
nigahon ko nahaq teri justuju hai
yaqinan numaish ke parde mein tu hai

mujhe bhul ja

By

mere saqiya mujhe bhul ja
mere dilruba mujhe bhul ja
na wo dil raha na wo ji raha
na wo daur-e-aish-o-khushi raha
na wo rabt-o-zabt-e-dili raha
na wo auj-e-tishna-labi raha
na wo zauq-e-baada-kashi raha
main alam-nawaz hun aaj-kal
main shikasta-saz hun aaj-kal
main sarapa raaz hun aaj-kal
mujhe ab khayal mein bhi na mila
mujhe bhul ja mujhe bhul ja
mujhe zindagi se aziz-tar
faqat ek teri hi zat thi
teri har nigah mere liye
sabab-e-sukun-e-hayat thi
meri dastan-e-wafa kabhi
teri sharh-e-husn-e-sifat thi
magar ab to rang hi aur hai
na wo tarz hai na wo taur hai
ye sitam bhi qabil-e-ghaur hai
tujhe apne husn ka wasta
mujhe bhul ja mujhe bhul ja
qasam iztirab-e-hayat ki
mujhe khamushi mein qarar hai
mere sahn-e-gulshan-e-ishq mein
na khizan hai ab na bahaar hai
yahi dil tha raunaq-e-anjuman
yahi dil charagh-e-mazar hai
mujhe ab sukun-e-digar na de
mujhe ab nawed-e-sahar na de
mujhe ab fareb-e-nazar na de
na ho wahm-e-ishq mein mubtala
mujhe bhul ja mujhe bhul ja

kahan hai aa ja

By

rahat-e-banda-e-be-dam kahan hai aa ja
paikar-e-husn sar-e-baam kahan hai aa ja
raunaq-e-bazm hai o jam kahan hai aa ja
zinat-e-jalwa-gah-e-am kahan hai aa ja
ai umid-e-dil-e-na-kaam kahan hai aa ja
teri furqat khalal-andaz-e-sukun-e-paiham
teri furqat dil-e-mayus pe ek turfa sitam
teri furqat sabab-e-kawish-o-bedari-e-gham
tu nahin hai to phir aaram kahan hai aa ja
shahid-e-aur-e-siyah-bakht o shab-e-tar hun main
khugar-e-nala-e-lazzat-kash-e-awaz hun main
dam-e-tufan-e-hawadis mein giraftar hun main
roz-o-shab muntazir-e-did-e-rukh-e-yar hun main
dil hai waqf-e-gham-e-alam kahan hai aa ja
shoala-e-bar-kaf-e-gul dagh-e-jigar tere baghair
khar-bardosh hai daman-e-nazar tere baghair
khun-fishan hai shab-e-gham dida-e-tar tere baghair
chalan aata hi nahin sham-o-sahar tere baghair
muntazir hun sahar-o-sham kahan hai aa ja
daur-e-tariki-e-gham se shab-e-tanhai se
dam-ba-dam josh-e-junun ki sitam-arai se
kaba-o-dair-o-kalisa ki jabin-sai se
khauf-e-majburi-o-nakaami-o-ruswai se
ishq hai larza-bar-andam kahan hai aa ja
muntashir hone lagi anjuman-e-naz-e-hayat
ban gaya khwab har ek manzar-e-aghaz-e-hayat
dam-shikasta sa nazar aane laga saz-e-hayat
ab koi dam mein hua jata hai wa raaz-e-hayat
aa gaya naza ka hangam kahan hai aa ja