mili hawaon mein uDne ki wo saza yaro

By

mili hawaon mein udne ki wo saza yaro
ki main zamin ke rishton se kat gaya yaro
wo be-khayal musafir mein rasta yaro
kahan tha bas mein mere us ko rokna yaro
mere qalam pe zamane ki gard aisi thi
ki apne bare mein kuchh bhi na likh saka yaro
tamam shahr hi jis ki talash mein gum tha
main us ke ghar ka pata kis se puchhta yaro
jo be-shumar dilon ki nazar mein rahta tha
wo apne bachchon ko ek ghar na de saka yaro
janab-e-'mir' ki khud-gharziyon ke sadqe mein
miyan 'wasim' ke kahne ko kya bacha yaro

kya bataun kaisa KHud ko dar-ba-dar maine kiya

By

kya bataun kaisa khud ko dar-ba-dar main ne kiya
umr-bhar kis kis ke hisse ka safar main ne kiya
tu to nafrat bhi na kar paega is shiddat ke sath
jis bala ka pyar tujh se be-khabar main ne kiya
kaise bachchon ko bataun raston ke pech-o-kham
zindagi-bhar to kitabon ka safar main ne kiya
kis ko fursat thi ki batlata tujhe itni si baat
khud se kya bartaw tujh se chhut kar main ne kiya
chand jazbaati se rishton ke bachane ko 'wasim'
kaisa kaisa jabr apne aap par main ne kiya

KHushi ka sath mila bhi to dil pe bar raha

By

khushi ka sath mila bhi to dil pe bar raha
main aap apni tabahi ka zimmedar raha
adhure khwab gae din ajaan andeshe
meri hayat pe kis kis ka ikhtiyar raha
jo sab pe bojh tha ek sham jab nahin lauta
usi parinde ka shakhon ko intizar raha
wo koi aur hi jazba tha sirf pyar na tha
tujhe jo apna jatane ko be-qarar raha
na jaane kis ka talluq tha mere sath 'wasim'
koi bhi dur hua mujh ko sazgar raha

kahan sawab kahan kya azab hota hai

By

kahan sawab kahan kya azab hota hai
mohabbaton mein kab itna hisab hota hai
bichhad ke mujh se tum apni kashish na kho dena
udas rahne se chehra kharab hota hai
use pata hi nahin hai ki pyar ki bazi
jo haar jae wahi kaamyab hota hai
jab us ke pas ganwane ko kuchh nahin hota
to koi aaj ka izzat-maab hota hai
jise main likhta hun aise ki khud hi padh panw
kitab-e-zist mein aisa bhi bab hota hai
bahut bharosa na kar lena apni aankhon par
dikhai deta hai jo kuchh wo khwab hota hai

hum apne aapko ek masala bana na sake

By

hum apne aap ko ek masala bana na sake
isi liye to kisi ki nazar mein aa na sake
hum aansuon ki tarah waste nibha na sake
rahe jin aankhon mein un mein hi ghar bana na sake
phir aandhiyon ne sikhaya wahan safar ka hunar
jahan charagh hamein rasta dikha na sake
jo pesh pesh the basti bachane walon mein
lagi jab aag to apna bhi ghar bacha na sake
mere khuda kisi aisi jagah use rakhna
jahan koi mere bare mein kuchh bata na sake
tamam umr ki koshish ka bas yahi hasil
kisi ko apne mutabiq koi bana na sake
tasalliyon pe bahut din jiya nahin jata
kuchh aisa ho ke tera eatibar aa na sake

haweliyon mein meri tarbiyat nahin hoti

By

haweliyon mein meri tarbiyat nahin hoti
to aaj sar pe tapakne ko chhat nahin hoti
hamare ghar ka pata puchhne se kya hasil
udasiyon ki koi shahriyat nahin hoti
charagh ghar ka ho mahfil ka ho ki mandir ka
hawa ke pas koi maslahat nahin hoti
hamein jo khud mein simatne ka fan nahin aata
to aaj aisi teri saltanat nahin hoti
'wasim' shahr mein sachchaiyon ke lab hote
to aaj khabron mein sab khairiyat nahin hoti