safar pe aaj wahi kashtiyan nikalti hain

By

safar pe aaj wahi kashtiyan nikalti hain
jinhen khabar hai hawaen bhi tez chalti hain
meri hayat se shayad wo mod chhut gae
baghair samton ke rahen jahan nikalti hain
hamare bare mein likhna to bas yahi likhna
kahan ki shamen hain kin mahfilon mein jalti hain
bahut qarib hue ja rahe ho socho to
ki itni qurbaten jismon se kab sambhalti hain
'wasim' aao in aankhon ko ghaur se dekho
yahi to hain jo mere faisle badalti hain

zindagi tujh pe ab ilzam koi kya rakkhe

By

zindagi tujh pe ab ilzam koi kya rakkhe
apna ehsas hi aisa hai jo tanha rakkhe
kin shikaston ke shab-o-roz se guzra hoga
wo musawwir jo har ek naqsh adhura rakkhe
khushk mitti hi ne jab panw jamane na diye
bahte dariya se phir ummid koi kya rakkhe
aa gham-e-dost usi mod pe ho jaun juda
jo mujhe mera hi rahne de na tera rakkhe
aarzuon ke bahut khwab to dekho ho 'wasim'
jaane kis haal mein be-dard zamana rakkhe

yahi bazm-e-aish hogi yahi daur-e-jam hoga

By

yahi bazm-e-aish hogi yahi daur-e-jam hoga
magar aaj ka tasawwur yahan kal haram hoga
main kuchh is tarah jiya hun ki yaqin ho gaya hai
mere baad zindagi ka bada ehtiram hoga
meri zist ek janaza hai jo rah-e-waqt mein hai
jo thakenge din ke kandhe to supurd-e-sham hoga
yahi hadsat-e-gham hain to ye dar hai jine walo
koi din mein zindagi ka koi aur nam hoga

use samajhne ka koi to rasta nikle

By

use samajhne ka koi to rasta nikle
main chahta bhi yahi tha wo bewafa nikle
kitab-e-mazi ke auraq ulat ke dekh zara
na jaane kaun sa safha muda hua nikle
main tujh se milta to tafsil mein nahin jata
meri taraf se tere dil mein jaane kya nikle
jo dekhne mein bahut hi qarib lagta hai
usi ke bare mein socho to fasla nikle
tamam shahr ki aankhon mein surkh shoale hain
'wasim' ghar se ab aise mein koi kya nikle

tumhaari rah mein miTTi ke ghar nahin aate

By

tumhaari rah mein mitti ke ghar nahin aate
isi liye to tumhein hum nazar nahin aate
mohabbaton ke dinon ki yahi kharabi hai
ye ruth jaen to phir laut kar nahin aate
jinhen saliqa hai tahzib-e-gham samajhne ka
unhin ke rone mein aansu nazar nahin aate
khushi ki aankh mein aansu ki bhi jagah rakhna
bure zamane kabhi puchh kar nahin aate
bisat-e-ishq pe badhna kise nahin aata
ye aur baat ki bachne ke ghar nahin aate
'wasim' zehn banate hain to wahi akhbar
jo le ke ek bhi achchhi khabar nahin aate

tamam umr baDe saKHt imtihan mein tha

By

tamam umr bade sakht imtihan mein tha
wo fasla jo tere mere darmiyan mein tha
paron mein simta to thokar mein tha zamane ki
uda to ek zamana meri udan mein tha
usi pe ho gaya qurban do dilon ka milap
wo jaedad ka jhagda jo khandan mein tha
tujhe ganwa ke kai bar ye khayal aaya
teri ana hi mein kuchh tha na meri aan mein tha