aashiq ka jahan mein ghar na dekha
aisa koi dar-ba-dar na dekha

jaisa ki ude hai tair-e-dil
aisa koi tez-par na dekha

khuban-e-jahan hon jis se taskhir
aisa koi hum hunar na dekha

tute dil ko bana dikhawe
aisa koi kari-gar na dekha

us tegh-e-nigah se ho muqabil
aisa koi be-jigar na dekha

jari hain hamesha chashma-e-chashm
aisa koi abr-e-tar na dekha

jo aab hai aabru mein 'hatim'
aisa koi hum guhar na dekha