ai nasim-e-sahari hum to hawa hote hain
dam jo ghutta hai mohabbat mein khafa hote hain

hum faqirana ghazal kahte hain ai shah-e-jahan
khair ho khair ho masruf-e-dua hote hain

bahr-e-alam mein ye insan hain manind-e-habab
dam mein bante hain ye dam-bhar mein fana hote hain

hum gharibon ko na is bazm se uthwa ai but
sohbat-e-am mein khasan-e-khuda hote hain

hum mein aur un mein badha rabta 'akhtar' itna
hum pe wo sadqe hain hum un pe fida hote hain