apne aanchal mein chhupa kar mere aansu le ja
yaad rakhne ko mulaqat ke jugnu le ja

main jise dhundne nikla tha use pa na saka
ab jidhar ji tera chahe mujhe khushbu le ja

aa zara der ko aur mujh se mulaqat ke baad
sochne ke liye raushan koi pahlu le ja

hadse unchi udanon mein bahut hote hain
tajraba tujh ko nahin hai mere bazu le ja

jo bhi ab hath milata hai tujhe puchhta hai
aa mere hathon se ye lams ki khushbu le ja

log us shahr mein kya jaane hon kaise kaise
mera lahja mere ikhlas ka jadu le ja