be-niyaz-e-bahaar sa kyun hai
dil ko zakhmon se pyar sa kyun hai

wo khafa hain ki hum gharibon ko
gham pe kuchh ikhtiyar sa kyun hai

meri aankhon ke khwab to gham hain
wo magar be-qarar sa kyun hai

aks us mein tha kis ke chehre ka
aaina sangsar sa kyun hai

aahaten pas aa ke dur huin
hum ko phir intizar sa kyun hai

kya koi sandali mahak si udi
dil mera pur-khumar sa kyun hai

zindagi talkh hai bahut 'anjum'
phir bhi zalim se pyar sa kyun hai