chamakte chand sitaro zara khayal karo
kabhi to dil se pukaro zara khayal karo

haya ke dhagon mein lipte hue hain hum donon
nai ruton ke ishaaro zara khayal karo

giri to tut ke bikhrungi dur dur kahin
ai kaghzi se sahaaro zara khayal karo

sulag raha hai kisi ka firaq tan-man mein
idhar na aao bahaaro zara khayal karo

milan ki aas hai lekin ye kaam na-mumkin
nadi ke donon kinaro zara khayal karo

'samina' ashk gira do ye zabt chhodo bhi
inhen na dil se guzaro zara khayal karo