dard-e-dil ki dawa kare koi
mere haq mein dua kare koi

surakh-ru is tarah bhi hote hain
khun-e-dil ko hina kare koi

sabr ye hai ki uf na ho lab par
lakh jaur-o-jafa kare koi

majma-e-am mein akela hun
dard mera suna kare koi

roz-e-raushan bane shab-e-hijran
chaak band-e-qaba kare koi

jo hai shaitan rahega shaitan hi
qudsiyon mein raha kare koi

azmaton ka 'falak muqaddar ho
sidq-e-dil se jhuka kare koi