dil-lagi aur chiz hoti hai
dilbari aur chiz hoti hai

rasm hai yun muanqa karna
dosti aur chiz hoti hai

ba-wazu hun main qibla-ru bhi magar
bandagi aur chiz hoti hai

in ujalon ko raushni na kaho
raushni aur chiz hoti hai

hum to lashen hain sans leti hui
zindagi aur chiz hoti hai

harf-dar-harf dard hain baba
shairi aur chiz hoti hai

bandishen aur chiz hain 'tariq'
shairi aur chiz hoti hai