gurez-pa hai naya rasta kidhar jaen

gurez-pa hai naya rasta kidhar jaen
chalo ki laut ke hum apne apne ghar jaen

na mauj-e-tund hai kuchh aisi jis se khelen hum
chadhe hue hain jo dariya kaho utar jaen

ajab qarine ke majnun hain hum ki rahte hain chup
na khak-e-dasht udaen na apne ghar jaen

jabin hai khak se aisi lagi ki uthti nahin
junun-e-sajda agar ho chuka to mar jaen

zamana tujh se ye kahna hai mar chuke hum log
ab apni lash tere bazuon mein dhar jaen

hamin bache hain yahan aakhiruz-zaman lekin
sabhon ko apna taaruf den dar-ba-dar jaen


Please share if you liked this!!!