hai tere dagh se tar sina-e-sozan mera
aab-o-rang aag se rakhta hai gulistan mera

gham ke hathon na raha kuchh bhi rafu ke qabil
bas-ki sau bar hua chaak gareban mera

mauj-e-dariya ki tarah zabt mein aa sakta nahin
koi kyun kar kahe ahwal-e-pareshan mera

ru agar dijiye is ko bhi to kuchh aib nahin
aaine se bhi gaya kya dil-e-hairan mera

main to zahir na karun us ki jafa ko lekin
chhup sake kyon ki 'yaqin' zakhm-e-numayan mera