halqa-e-sham-o-sahar se nahin jaane wala
dard is dida-e-tar se nahin jaane wala

pa-ba-zanjir nikalega safar ki tadbir
tantana farq-e-hunar se nahin jaane wala

tishna-lab ko to mayassar nahin ek jura-e-ab
bul-hawas luqma-e-tar se nahin jaane wala

munqat'a karte hain bagh-o-shajar-wa-shakh use
rabt mehnat ka samar se nahin jaane wala

pur-kashish bhi hai sar-afraazi-e-duniya bhi magar
zahr ganjina-e-zar se nahin jaane wala

tark-e-duniya ho ki duniya ki talab ho pyare
ye wo sauda hai jo sar se nahin jaane wala

is pe ek aur ghazab abru-e-khamdar bhi hai
bach ke is tegh-e-nazar se nahin jaane wala

sari khushbu simat aai alif-e-qamat ki
gul-e-tar kaf-e-kamar se nahin jaane wala

pairaw-e-sher-e-khuda hun asadullahi hun
ya-'ali' main tere dar se nahin jaane wala