har dukh ko main jheli hun

har dukh ko main jheli hun
dard-bisat pe kheli hun

khud se hi dil ki baat karun
apni aap saheli hun

kya koi mujh ko jaanega
aisi ek paheli hun

tere jahan ko mahkaun
champa aur chameli hun

apne hisar mein laun tujhe
dast-e-dua ki hatheli hun

mujh mein basta nahin koi
pur-asrar haweli hun

karun jo tere bas mein nahin
wo sarmast albeli hun

is pur-shor zamane mein
'khanam' kitni akeli hun