hath mein apne hifazat ka asa le jaana
ghar se jaana to buzurgon ki dua le jaana

baat jab tark-e-talluq hi pe aa pahunchi hai
apne khat bhi mere kamre se utha le jaana

jeb khali hai magar dil mein badi wusat hai
tum mere ganw ke logon se wafa le jaana

tere hathon mein hai patwar meri kashti ki
tu jidhar chahe usi samt baha le jaana

mujh se milne ke liye wo bhi tadapta hoga
mere khwabo mujhe hathon pe utha le jaana

pagdiyan roz uchhalti hon jahan par 'ejaz'
hum ne sikha wahan izzat ko bacha le jaana