jaane wo chiz kya thi jo chamki zamin par
ujle se log aa gire maili zamin par

tere liye wo dhup ka tukda raha rahe
mere liye to aag si barsi zamin par

suraj ne di jo aag wo suraj mein ghol di
thi rakh is zamin ki so rakh di zamin par

ye bad-hawas jism kisi kaam ka nahin
lagta hai jaise lash ho jalti zamin par

ye fasla nahin hai zarurat ki baat hai
titli hai phul par to hai chinti zamin par

pahle pahal to main use shair nahin laga
ab sher kah raha hai wo meri zamin par