jam la jam ki aalam se ji darta hai
asar-e-gardish-e-ayyam se ji darta hai

lab pe ab aariz-o-gesu ke fasane kya hon
fitnaha-e-sahar-o-sham se ji darta hai

tujh ko main dhundhta phirta hun dar-o-baam se dur
ab tajalli-e-dar-o-baam se ji darta hai

gul khilae na kahin fitna-e-dauran kuchh aur
aaj-kal daur-e-mai-o-jam se ji darta hai

nigah-e-mast ke qurban meri samt na dekh
mauja-e-baada-e-gulfam se ji darta hai

chhod kar rah mein but-khane guzar jata hun
hosh mein jalwa-e-asnam se ji darta hai

raat ki zulmaten badhti hi chali jati hain
'akhtar' apna to sar-e-sham se ji darta hai