jang-e-hayat-o-maut mein kya kya nahin hua
guzra hai dard had se pe chaara nahin hua

main ne sada rakhin yahin qatron si fitraten
main aaj tak ghurur ka dariya nahin hua

kya hadsa hai ye bhi ki rishta tera mera
bas bij rah gaya kabhi pauda nahin hua

jab ilm ne jahan ko taqsim kar diya
achchha hai la-khirad hun main dana nahin hua

bimariyon mein aaega pursish ko roz wo
ye soch kar 'sahab' main achchha nahin hua