kabhi bhule se mumkin ho meri jaanib agar hona
to auron ki taraf se apni nazren pher kar hona

musalsal hijr ke sadme ye dil ab sah nahin sakta
ghadi bhar ka juda hona agar bar-e-digar hona

ghanimat hai ki ek rasmi taaruf to mayassar hai
nahin aasan kisi mah-wash ka manzur-e-nazar hona

na hona tum kisi ke bhi yahan par ham-safar yaro!
agar hona samajh kar soch kar kuchh dekh kar hona

nahin hai bais-e-azar-e-jaan tarz-e-amal koi
magar us ka mere bare mein akasr be-khabar hona

wo sun lete hain yun to sher mere ru-ba-ru phir bhi
zaruri to nahin har dil pe sheron ka asar hona

main apni zat mein jaisa bhi hun jo kuchh bhi hun 'nasir'
farishton se kahin behtar hai mujh sa bhi bashar hona