muddat se koi shor bapa ho nahin raha

muddat se koi shor bapa ho nahin raha
aur hath hai ki dil se juda ho nahin raha

ek subh thi jo sham mein tabdil ho gai
ek rang hai jo rang-e-hina ho nahin raha

hum bhi wahi diya bhi wahi raat bhi wahi
kya baat hai jo raqs-e-hawa ho nahin raha

hum bhi kisi khayal ke sannahaton mein gum
tum se bhi pas-e-ahd-e-wafa ho nahin raha

kya chahti hai hum se hamari ye zindagi
kya qarz hai jo hum se ada ho nahin raha


This is a great hina anjum shayari. Please share if you liked this!!!