nahin qaul se fel tere mutabiq kahun kis tarah tujh ko ai yar sadiq na jannat ke qabil na dozakh ke laeq mujhe kyun kiya khalq ai mere khaliq hue hijr mein wo marz mujh ko lahiq rahe dang jis mein atibba-e-haziq bharosa karam par hai hum aasiyon ko ghazab par samajhte hain rahm us ka faiq faqat kunha zat us ki ab tak na samjhe hue munkashif aur sare daqaeq jhagad lenge aapas mein shaikh o barhaman tujhe kya bakhedon se o mard-e-ashiq jo ye us ki rahmat ki tughyaniyan hain kuja zohd-e-zahid kahan fisq-e-fasiq kiya nafs ko mujh pe kyun tu ne ghaalib na tha kya teri bandagi ke mein laeq na rakhna mujhe apni rahmat se mahrum teri zat se hai ye ummid-e-wasiq na tab aaegi husn ki tere ai dost main musa nahin hun jo jalwe ka shaiq tajarrud ka aalam tujhe kya bura tha hua kis liye pa-e-band-e-alaeq shikayat ka fiqara zaban tak na aaya bahar-haal karta raha shukr-e-khaliq sar o chashm se main baja laun sahib jo khidmat koi howe bande ke laeq bhala kis se bahlaun dil is chaman mein na sumbul na nasrin na gul na shaqaiq rulate ho aashiq ko be-wajh-o-bais hansnegi meri jaan tum par khalaiq kiye moajaze husn ne donon yakja shab-e-tira gesu jabin subh-e-sadiq kaha sun ke afsana-e-qai-o-laila abas karte ho haal mein zikr-e-sabiq gaya wo zamana wo log ud gae sab na mashuq waise rahe ab na aashiq shunidem nam-o-nishanash nadidem chu anqast madum yar-e-muafiq meri jaan muddat se marta hun tujh par tere chand se munh ka aashiq hun aashiq hua rashk-e-laila ki furqat mein majnun mera haal aur qais ka hai mutabiq abas fauq deta hai tu khud ko nadan kiya ek ko ek par us ne faiq wo munshi bane qudrat-e-haq to dekho jo maktab mein padhte the insha-e-faiq dua hai yahi aur yahi hai tamanna najaf mein mare ja ke ye 'rind'-e-fasiq