nigah-e-lutf kabhi gar wo mast-e-naz kare
niyaz-mand ko aalam se be-niyaz kare

wo sar-nawisht-e-jabin par baja hai naz kare
jo aastan pe tere sajda-e-niyaz kare

na tere chahne walon mein ho ye jang-o-jadal
ishaara gar na teri chashm-e-fitna-saz kare

bujhaen pyas kahan ja ke tere mastane
jo saqiya dar-e-mai-khana tu na baz kare

jahan mein shor hai aur wo nigar parde mein
ajab ho sair jo wo rukh se parda baz kare

nahin wo lazzat-e-azar-e-ishq se aagah
sitam mein aur karam mein jo imtiyaz kare

jo chahe garmi-e-hangama bazm-e-dauran mein
sada buland kare aur zaban daraaz kare

jo bazm-e-uns mein chahe ki sham-e-mahfil ho
tu dil mein ishq se paida zara gudaz kare

inhin ke husn se hai garm ishq ka bazar
dua khuda se hai umr-e-butan daraaz kare

fasana-go se kaho mukhtasar ho qissa-e-jam
hadis-e-gesu-e-jaanan zara daraaz kare

ye silsila gham-e-dauran ka hai abad paiwand
sukun dil ka jo chahe wo tark-e-az kare

khuda ka nam bhi lo bazuon se kaam bhi lo
to fikr-e-kar khudawand-e-karsaz kare

hawa-o-hirs se 'nazir' rahe jo pak nazar
to hamsari na haqiqat ki kyun majaz kare