raat guzri to yaqin tha ki sawera hoga
kya khabar thi ki wahi ghor-andhera hoga

rah mein jin se tha saya wo shajar sukh gae
ab khuda jaane kahan apna basera hoga

na-shanasan-e-mohabbat se tawaqqo hai fuzul
jo khud apna na hua kis tarah mera hoga

ham-nashino shab-e-furqat ko ghanimat samjho
ab koi sham na hogi na sawera hoga

aastinon mein hai sanp apne chhupae jo shakhs
wo mera dost ho kyon koi sapera hoga

tul khincha hai bahut tira-shabi ne lekin
tabal-e-subh ke bajte hi sawera hoga

subh-e-sadiq ki shuaen ye batati hain 'wafa'
subh-e-kazib ka bas ab dur andhera hoga