sabhon se yun to hai dil aap ka khush
agar puchho to hai hum se hi na-khush

khushi teri hi hai manzur hum ko
bala se gar koi na-khush ho ya khush

rawaq-e-chashm o qasr-e-dil kiya sair
na ki par aap ne yan koi ja khush

jafa kar ya wafa mukhtar hai tu
mujhe yaksan hai kya na-khush hai kya khush

nahin us mein to ghair-az-jaur lekin
mujhe kya jaane kya aai ada khush

kiya hai garche na-khush tu ne hum ko
rakhe par ai butan tum ko khuda khush

khushi hai sab ko roz-e-id ki yan
hue hain mil ke baham aashna khush

bhala kuchh bhi munasib hai meri jaan
ki ho tu aaj ke din mujh se na-khush

bata aisi koi tadbir 'bedar'
ki jis se howe mera dilruba khush