sar-e-rah ek hadisa ho gaya

sar-e-rah ek hadisa ho gaya
achanak tera samna ho gaya

khud apni bhi ab yaad aati nahin
teri yaad ka haq ada ho gaya

masihaiyan dekhti rah gain
tera dard badh kar dawa ho gaya

kategi kis ummid par zindagi
agar tera gham bhi juda ho gaya

qarib aa gain khud-bakhud manzilen
tera naqsh-e-pa rahnuma ho gaya

unhen dekh kar dekhti rah gain
khuda jaane aankhon ko kya ho gaya

'rishi' zindagi zindagi ban gai
dil apna alam-ashna ho gaya