sham tak meri bekali hai sharab
sham ko meri sarkhushi hai sharab

jahl-e-waiz ka is ko ras aae
sahibo meri aagahi hai sharab

rang-ras hai meri ragon mein rawan
ba-khuda meri zindagi hai sharab

naz hai apni dilbari pe mujhe
mera dil meri dilbari hai sharab

hai ghanimat jo hosh mein nahin main
shaikh tujh ko bacha rahi hai sharab

his jo hoti to jaane kya karta
muftiyon meri be-hisi hai sharab