soz-e-dil hai khamushi se jal ke bujh jaane ka nam
zindagi hai sham-e-gul ke ashk barsane ka nam

meri nazren aap ki jaanib hain duniya par nahin
aap kya kahte hain dekhun apne diwane ka nam

hai farogh-e-shama tak hangama-e-bazm-e-hayat
subh-dam leta nahin hai koi parwane ka nam

husn hai ek be-niyazana charagh-e-dil-fareb
ishq hai anjam se be-khauf jal jaane ka nam

ahl-e-danish ko na jaane kya zarurat aa padi
le rahe hain aaj-kal farzane diwane ka nam