tanhai ka dukh gahra tha
main dariya dariya rota tha

ek hi lahar na sambhali warna
main tufanon se khela tha

tanhai ka tanha saya
der se mere sath laga tha

chhod gae jab sare sathi
tanhai ne sath diya tha

sukh gai jab sukh ki dali
tanhai ka phul khila tha

tanhai mein yaad-e-khuda thi
tanhai mein khauf-e-khuda tha

tanhai mehrab-e-ibaadat
tanhai mimbar ka diya tha

tanhai mera pa-e-shikasta
tanhai mera dast-e-dua tha

wo jannat mere dil mein chhupi thi
main jise bahar dhund raha tha

tanhai mere dil ki jannat
main tanha hun main tanha tha