umid koi nahin aasra bhi koi nahin

umid koi nahin aasra bhi koi nahin
dawa bhi koi nahin ab dua bhi koi nahin
kuchh itne ho gae bezar apne haal se log
ki apne haal pe ab sochta bhi koi nahin
batae kaun wahan kya guzar gai kis par
ki is dayar se aaya gaya bhi koi nahin
hisar-e-jaan ke wo us par hi to rahta hai
faqat hai shart-e-safar fasla bhi koi nahin
guzar hua jo kabhi us se mil liye warna
sawal us se kuja muddaa bhi koi nahin
mere sukhan ne mujhe ru-shanas sab se kiya
wagarna chehre se pahchanta bhi koi nahin
hamin ne khud pe kiye band sare dar 'mohsin'
nikalna chahen to ab rasta bhi koi nahin