zaban majbur hai lab par fughan hai
sarapa dard meri dastan hai

nigah-e-yar bhi hai bad-guman si
ghurur-e-husn bhi daman-kashan hai

firaq-e-dost ka kya zikr aakhir
visal-e-yar bhi dil par garan hai

yahan par baat karna hai qayamat
wahan fariyaad ki jurat kahan hai

mera gham hai mera sarmaya-e-zist
mera har ashk mera tarjuman hai

khumar-alud nazron mein hai jo kaif
wo saqi tere saghar mein kahan hai

agar mai husn hai to ishq 'faruq'
khumar-e-baada-e-shola-fishan hai