zindan-e-kaenat mein mahsur kar diya
mahfil se apni tum ne bahut dur kar diya

aate ho dene dawat-e-dar-o-rasan hamein
jab hum ne tark-e-shewa-e-mansur kar diya

fitrat yahi azal se hai barq-e-jamal ki
us ne jise tabah kiya tur kar diya

tum ne hamare zarf-e-nazar par na ki nigah
sare jahan ko husn se mamur kar diya

'simab' koi martaba mansur ka na tha
lafz-e-khudi ki sharh na mashhur kar diya