aadmi pahle to lazim hai ki insan bane
phir bhale hindu isai ya musalman bane

sikh paya nahin jo pyar ke aksar dhai
kyon rate wed wo kyon hafiz-e-quran bane

dil ki daulat hai mili jis ko hai wo sab se amir
sone chandi se na hargiz koi dhanwan bane

arsh pe hogi hukumat teri shayad maula
is zamin par to kai aur hain bhagwan bane

ai 'sada' un ki na taqlid tu hargiz karna
kar ke taqlid jo hain sahib-e-diwan bane