aamir-e-aql se 'shahzad' baghawat kar len
aao us shakhs se iqrar-e-mohabbat kar len

kal na-jaane ki kise waqt kahan le jae
aaj pal-bhar hi sahi khwab haqiqat kar len

us ko tohmat se bachana hai har ek qismat par
hanste rahna hi chalo aaj se aadat kar len

kaun manzil ke liye lutf-e-safar ko khoe
chalte rahne se hi tajdid-e-rifaqat kar len

hum ne sab dip bujha dale hain imshab taki
sath jo chal na saken tark-e-mohabbat kar len