aankhon mein mohabbat hai to hathon mein hai talwar
khulta hi nahin mujh pe ki kaise hain mere yar

ye baat alag hai ki koi kahta nahin hai
be-aib nahin warna yahan sahab-e-dastar

mahrumi-e-qismat ka ye aalam hai ki hum log
marne se hain khaif kabhi jine se hain bezar

kya waqt tha dariya mein rawani bhi ghazab thi
kya waqt hai ab mujh mein nahin quwwat-e-guftar

'zaryab' yahi baat mujhe mar rahi hai
tu bhi na hua sath mere chalne ko tayyar