ab dil ki taraf dard ki yalghaar bahut hai
duniya mere zakhmon ki talabgar bahut hai

ab tut raha hai meri hasti ka tasawwur
is waqt mujhe tujh se sarokar bahut hai

mitti ki ye diwar kahin tut na jae
roko ki mere khun ki raftar bahut hai

har sans ukhad jaane ki koshish mein pareshan
sine mein koi hai jo giraftar bahut hai

pani se ulajhte hue insan ka ye shor
us par bhi hoga magar is par bahut hai